خانی نیوز:
وه‌لاتێ كه‌نه‌دا ب ژڤانه هه‌ژمارا په‌نابه‌ران ل وه‌لاتێ خۆه د ده‌مێ سێ سالێن بهێت دا زێده‌بكه‌ت و ل ژڤانێ نه ملیۆنه‌ك و دوسه‌د هزار په‌نابه‌ران د ده‌مێ ده‌ستنیشانكرى دا وه‌رگرن.
ماركۆ مێندیسینۆ، وه‌زیرێ كۆچا كه‌نه‌دا ڕاگه‌هاند، دێ هه‌ژمارا وه‌رگرتنا په‌نابه‌ران ل كه‌نه‌دا ل سالێن دوهزار و بیست و ئێكێ هه‌تا دوهزار و بیست و سێیێ زێده‌كه‌ن، ئه‌ڤه ژى پشتى كێمبوونا هه‌ژمارا په‌نابه‌ران د ئه‌ڤساله دا.
وه‌زیرێ كوچا كه‌نه‌دا د پرێس كۆنفرانسه‌كى دا ڕاگه‌هاند، وه‌لاتێ وى ب ژڤانه د ده‌مێ سێ سالێن بهێت دا پێشوازییێ ل ملیۆنه‌ك و دوسه‌د هزار په‌نابه‌ران بكه‌ت، ب ڤى شێوه‌ى ژى 200 هزار په‌نابه‌رێن دى دێ ل سه‌ر وێ هه‌ژمارا په‌نابه‌ران زێده‌بن یا وه‌لاتێ كه‌نه‌دا به‌رى به‌لاڤبوونا ڤایرۆسێ كۆرۆنا راگه‌هاندى.
ماركۆ مێندیسینۆ زێده‌تر گوت، ئه‌ڤساله كه‌نه‌دا ب تنێ 341 هزار په‌نابه‌ر وه‌رگرتینه، ئه‌ڤه‌ژى ژ ئه‌گه‌رێ به‌لاڤبوونا ڤایرۆسێ كۆرۆنا و راگرتنا گه‌شتێن عه‌سمانى یێن ناڤده‌وله‌تى بو ده‌مه‌كێ درێژ.
پیشبینى دهێته‌كرن ل ده‌ستپێكا سالا 2021 ره‌وش ئاساى ببیت، ب ڤى شێوه‌ى ژى پلانا كوچكرنا ئاشكه‌را بۆ وى وه‌لاتى دێ ئاساى بیت. بۆ قه‌ره‌بووكرنا وێ هه‌ژمارا كێم یا په‌نابه‌رێن ل سالا 2020 چووینه وى وه‌لاتى، حكومه‌تا كه‌نه‌دا ب ژڤانه مافێ مانا هه‌تا هه‌تاى بده‌ته كرێكارێن بیانى، و داخازكرنا مافێ په‌نابه‌ریێ بده‌ته وان خوانده‌ڤانێن بیانى یێن ب مه‌ره‌ما خواندنی چووینه كه‌نه‌دا.
كه‌نه‌دا دێ 200 هزار په‌نابه‌رێن دى وه‌رگریت
