خانى نیوز: عه‌زیز هه‌ورامى، حه‌له‌بجه
عه‌زیز هه‌روامى، په‌یامنێرێ خانى نیوز ل سلێمانیێ و هه‌له‌بجه راگه‌هاند، ده‌سته‌كێن پارتییا كاركه‌رێن كوردستانێ په‌كه‌كێ و ئیتلاعاتا ئیرانێ ل ژێر ناڤێ خوه‌نیشادانان ل باژارێن سلێمانیێ و چه‌مچه‌مال و رانیه و گه‌رمیان ده‌ست ب تێكدانێ و ئالۆزیان كرییه.
په‌یامنێرێ خانى نیوز ئاشكرا كر، عه‌بدوللا مه‌لا نوورى، په‌رله‌مانتارێ به‌رێ یێ ته‌ڤگه‌را گۆڕان و یێ نها سه‌ر ب په‌كه‌كێ ڤه، ده‌ست ب خوه‌نیشادان و تێكدانا باژاران كرییه، هێزێن ئێمناهیێ ژى عه‌بدوللا مه‌لا نوورى ده‌سته‌سه‌ر كرییه.
دلشاد نامق، چاڤدرێ سیاسى ل سلێمانیێ بۆ خانى نیوز راگه‌هاند، ئه‌وا نها ل ژێر ناڤێ داخوازكرنا مافان و خوه‌نیشادانان دهێته كرن، تێكدان و ئالۆزكرنا ره‌وشێ یه ب ده‌ستێن ده‌ره‌كى، پێدڤییه وه‌لاتى ژى هشیار بن نه‌كه‌ڤنه ته‌لها نه‌حه‌زێن كوردستانێ.
دلشاد نامق ئاشكرا كر، ئه‌و كه‌سێن داخوازا مافێن خوه دكه‌ن، پێدڤییه رێ نه‌ده‌ن خه‌لكێ تێكده‌ر تێكه‌لى وان ببیت و زیانێ بگه‌هینن مال و مولكێ گشتى.
ژ ئالییه‌كێ دى ڤه به‌كر پێنجوینى، به‌رپرسێ لژنا ناوچا پارتییا دیمۆكراتا كوردستانێ ل پێنجوین بۆ خانى نیوز راگه‌هاند، په‌كه‌كێ هێرشه‌كا به‌رفره‌هـ ب هه‌موو جۆرێن چه‌كى كرییه سه‌ر باره‌گه‌هێ ناوچا وان و پێشمه‌رگه‌یه‌ك ب چه‌كێ نیشانگر شه‌هید كرییه و سێ ژى بریندار بووینه.
د خوه‌نیشاداننێن چه‌ندین رۆژێن بوورى دا ل پارێزگه‌ها سلێمانیێ، تا نها نه‌هـ كه‌سان ژیانا خوه ژ ده‌ست دایه و ب سه‌دان كه‌س ژى برینداربووینه، ب ده‌هان باره‌گه‌هێن حزبى و ئاڤاهیێن حكومه‌تێ ژى هاتینه سۆتن و تالان كرن.
