ژ ئه‌گه‌رێ كێشه‌یه‌كا جڤاكى، ژنه‌كا خه‌لكێ گونده‌كێ سه‌ر ب باژێرێ دێوالان یا سه‌ر ب پارێزگه‌ها سنه ڤه ب ده‌ستێ هه‌ڤژینێ خۆه هاته كوشتن.
یوسف ده‌روێشى، فه‌رماندێ پۆلیسێن باژێرێ دێوالان راگه‌هاند، ئه‌و ژن ل شه‌ڤا دوشه‌مبى ل گوندێ تیله‌كۆڤه ب چه‌قۆیێ هاته كوشتن، و هه‌ڤژینێ وێ ژى برینداربوویه و بۆ نه‌خوشخانێ هاتییه ڤه‌گوهاستن.
یوسف ده‌روێشى گۆت ژى، ڤه‌كۆله‌رێن پۆلیسان بۆ ته‌مامكرنا دۆسه‌یا وێ روودانێ سه‌ره‌دانا نه‌خۆشخانێ كر و د ڤه‌كۆلینێن ده‌ستپێكى دا هه‌ڤژینێ وێ دانپێدان ب كوشتنا وێ كریه.
ده‌رباره‌ى وێ بویه‌رێ، رێكخستنا هه‌نگاو یا مافێن مرۆڤى ئاماژه ب وێ یه‌كێ دا، ناڤێ وێ ژنێ ئازاده مروه‌تى یه و ژیێ وێ 21 سالن، هه‌ڤژینێ وێ ژى 26 ساله و ده‌مێ چه‌ند هه‌یڤانه ژیانا هه‌ڤژینیێ پێك ئیناى.
چه‌ندین حه‌فتیێن بوورى ئه‌ڤه حاله‌تێ پێنجێ یێ كوشتنا ژنایه ب ده‌ستێ كه‌سوكارێن وان ل رۆژهه‌لاتێ كوردستانێ، ده‌ستپێكا بهارا ئه‌ڤساله، ب كێمى 11 ژن ل رۆژهه‌لاتێ كوردستانێ ب تۆمه‌تێن جوداجودا ب ده‌ستێ كه‌سوكارێن وان هاتینه كوشتن، پێنج ژوان ژى د هه‌یڤا كانوونا ئێكێ دا بوون.
پێشتر ژى ژنه‌كا 26 سالى یا خه‌لكێ ده‌ڤه‌را دالاهۆ سه‌ر ب پارێزگه‌ها كرماشان، ژ ئه‌گه‌رێ لێدانا هه‌ڤژینێ وێ هاته كوشتن. و حه‌فتییا بوورى، كچه‌كا 22 سالى خه‌لكا دێلۆران ل پارێزگه‌ها ئیلامێ ب ده‌ستێ برایێ خۆه هاته كوشتن. رۆژه‌كێ به‌رى وێ ژى ل باژێرێ سه‌رده‌شت یێ پارێزگه‌ها ئۆرمیێ، ژنه‌كا 43 سال ب ناڤێ وه‌فا ل به‌ر ده‌رگه‌هێ مالا وێ ب به‌هانه‌یا شه‌ره‌فێ هاته كوشتن. هه‌روه‌سا ل رۆژا 1 كانوونا ئێكێ یا سالا 2020، ژنه‌كا خه‌لكێ باژێرێ سنه ب تۆمه‌تا هه‌بوونا په‌یوه‌ندییان دگه‌ل زه‌لامه‌كێ دى ب ده‌ستێ دو برایێن خۆه هاته كوشتن.
