رۆژ بۆ رۆژێ بھایێ دۆلارێ ئەمریکی ل بازارێن ئیراق و ھەرێما کوردستانێ بەر ب بلندبوونێ دچیت و بسپۆرەکێ ئابوری رەتکر، بھایێ دۆلاری ب ڤی ئاستێ نوکە دا بمینیت و دبێژیت: بھایێ دۆلاری دێ ڤەگەریت بۆ ئاستێ بەرێ، بەلێ ھه‌ژمارەکا سیاسی و حکومەتا ئیراقێ مفادارن ژ ڤێ رەوشا بازاری.
دکتۆر خالد حەیدەر، بسپۆرێ ئابووری بۆ خانی نیۆز دیارکر، پشتی پەسەندکرنا قانوونا کورتئینانا دارایی ژلایێ جڤاتا نوونه‌رێن ئیراقێ ڤە، حکوموتا ئیراقێ دەست ب جهئینانا قانوونێ کریە و چاپکرنا پارێ ئیراقێ زێدەکریە، بەری نوکە پێنجى و شه‌ش ترلیۆن دھاتنە چاپکرن، بەلێ نوکە چاپکرنا پارێ ئیراقێ بلندکریە بۆ هه‌شتێ و هه‌شت ترلیۆن دیناران و ئەو پارە ژی کەفتیە بازاری، بێگۆمان دەمێ پارەیەکێ زۆر دکەڤیتە بازاری دێ کاریگەری ل سەر بازاری ھەبن، بتایبەتی بەنکا ناڤەندیا ئیراقێ رێژا بازارکرن ئانکو فرۆتنا دۆلاری جێگیر کر، ئەڤە ژی بۆ ئەگەرێ ڤێ چەندێ بھایێ دراڤێ ئەمریکی ھەمبەری دینارا ئیراقی گه‌له‌ك بلند ببیت، ئەڤە ژبلی ڤێ ئێکێ بازرگانان ڤێ دوماھیێ دگەل کێمبوونا مەترسیێن کۆرۆنایێ بەرێ خۆ دایە کرینا دۆلاری كو پێدڤی بوو زێری بکرن، خواست ل سەر دۆلارێ ئەمریکی ل ئیراقێ زۆر زێدەکریە.
ئەڤی بسپۆرێ ئابووری گۆت ژی: بلندبوونا بھایێ دۆلاری مفایەکێ مه‌زن دگەھینتە حکومەتا ئیراقێ، ژبه‌ركو ئەو پەترۆلا ئیراق دفرۆشیت ب دۆلارە و پشتی گۆھرینێ وەک مووچە بەلاڤ دکەت، ئانكو داھاتێ ئیراقێ زێدە دبیت ب ئەگەرێ بلندبوونا دۆلاری.
دکتۆر خالد حەیدەر ئاشکراکر، ھەیڤا داھاتی دێ کۆمبوونەکا رێکخراوا ئوپێک پلەس ل دۆر رەوشا پەترۆلێ هێته كرن و ئەو باوەره دێ بھایێ پەترۆلێ ھێشتا بلند بیت، ئەگەر بھایێ پەترۆلێ بلندبوو ئەڤە دێ دۆلارەکێ زێدە کەڤیتە بازارێ ئیراقێ و ھێدی ھێدی بھایێ دۆلاری دێ ڤەگەریت بۆ بەری نوکە، ژلایەکێ دی ڤە ھژمارەکا سیاسیێن ئیراقی ژ رەوشا نوکەیا بلندبوونا دۆلاری مفادارن و مفایەکێ زۆر کریە، ئەو بازرگان و سیاسی لڤینان ب بازاری دکەن بۆ بەرژەوەندیێن خوه، بەلێ ب دیتنا وى بلندبوونا بھایێ دۆلاری دەمکیە و دێ ھەر داکەڤیت.
ھەولێر، قائید میرۆ
