وەلاتیەكێ دەڤەرا بارزان پشتی چەند سالێن كاركرنێ كارگەهەكا بچووك یا دروستكرنا چه‌قۆیان د ناڤ مالا خوە دا دانایە كو چەندین جۆرێن چه‌قۆیان دروستكرینە و بكڕێن باش هەنە.
حسێن مستەفا نزاری، خودانێ كارگەها دروستكرنا چه‌قۆیان بۆ خانی نیوز گۆت: هەر مرۆڤەكێ ژ دایك دبیت بەهرەكا هەیی، بەلێ بەهرەیێ پێدڤی ب كاركرن و گرنگیدانێ هەیە، دەمەك بوو من حەز ل سەر وارێ پیشەسازی هەبوو، ب تایبەتى دروستكرنا چه‌قۆیان ب رەنگەكێ ستاندەر پشتی دەمەكێ من شیا بگەهم ئارمانجا خوه و چه‌قۆیان دروست بكەم.
ناڤهاتى گۆت ژى: ل سالا 2016 ئه‌و شیا ئێكەم چه‌قۆ دروست بكەت ئەو دەستپێكەكا باش بوو كو پتر گرنگیێ ب كارێ خوە بدەت، سەرەرای كارگەهەكا بچووك ل مال دانایە وى ڤیایە بەرفرەهـ بكەت بۆ وێ چەندێ بشێت پتر كارێن پیشەسازی بكەت، پشتی هژمارەكا چه‌قۆیان فرۆتین ئەو بوو هاندەرەك باش كو پتر گرنگیێ ب كارێن خوه بدەت، نها پتریا بكڕان داخواز دكەن ل دووڤ حەزا وان چه‌قۆیان بۆ دروست دكەت.
ئاشكرا كر ژى، هەموو كارێن خوە ل مال ئەنجام ددەت، ئەو كەرەستێن ل كوردستانێ ب دەست نەكەڤن ژ ئه‌ورۆپا ب دەستڤە دئینیت، ب رەنگەكێ ستاندەر چه‌قۆیان دروست دكەت و هەموو كارێن دروستكرنا چه‌قۆیان كارێ وى نه، نەخش و رەنگ و كەڤەر هەتا نوكە چۆ چه‌قۆ وەك ئێك دروستنەكرینە.
حسێن مستەفا نزاری گۆت ژى: وەلاتی و بەرپرس و كەسایەتی گەلەك داخوازا كارێن وى یێن دەستی دكەن و پەیوەندیێ دكەن كۆ چه‌قۆیان بۆ دروست بكەت و حه‌زه‌كا باش ل سەر هەیە ل ناڤخۆیا كوردستانێ و دەرڤە بكڕ هەنە .
ل دۆر بهایێ چه‌قۆیان ژى گۆت: بهایێ چه‌قۆیان یێ جودایە و ژ سێسه‌د دۆلاران دەستپێدكەت هه‌تا دگه‌هنه هزار دۆلاران، هندەك بكڕ بهایێ چه‌قۆیان دیار دكەن و هندەكا ژی ئەو بهایێ وان دیار دكەت، ژبلی وەلاتیان چه‌قۆیان بۆ گۆشتفرۆش و خوارنگەهان ژی دروست دكەت.
خانی نیوز، رەمەزان هەرنی:
