دیاردا کرنا نشتەگەریێن جوانکاریێ د ناڤ چڤاکی دا رۆژ ب رۆژ بەر ب زێدەبوونێ دچیت، نۆشدارەک ژی دبێژیت: وان نشتەگەریان زیانێن خوه ھەنە.
کچەکا نشتەگەریا جوانکاریێ کری و نەڤیا ناڤێ خوه دیار بکەت بۆ خانی نیوز گۆت: د ناڤ کۆمەلگەھێ دا ل ڤان دوماھیان گەلەک گرنگی ب جوانیێ دھێتە دان تایبەت بۆ ژیانا ھەڤژینیێ بوویە مەرجەکێ سەرەکی، لەورا کچ پەنایێ دبەنە نشتەگەریان، راستە زیان ژی ھەنە بۆ مروڤی لێ یا بوویە چاڤلێکرن.
کاروان شاھین، نۆشدارێ تایبەتمەند ب نشتەگەریێن جوانکاریێ بۆ خانی نیوز گۆت: ل ڤان سالێن دوماھیێ کرنا نشتەگەریێن جوانکاریێ ل پارێزگەھا دھۆکێ بەر ب زێدەبوونێ چوویە ل نك ھەردووک رەگەزان لێ رێژا ژنان پترە، ب گشتی نشتەگەری بۆ پتریا ئەندامێن لەشی دھێتە کرن وه‌كو گوھی، راکێشانا چاڤان، راکرنا دوھنی ژ زکی و گەلەکێن دی، لێ پتر نشتەگەریا جوانکاریا دفنێ دھێتە کرن.
کاروان شاھین گۆت ژی: ئەو کەسێن ڤان نشتەگەریان دکهن دڤێت ژیێ وان یێ گونجایی بیت، ژبه‌ركو بۆ کەسێن ژیێ وان بچووك زیانێن خوه ھەنە، ب گشتی نشتەگەری و بوتوکس و فیلەران زیانێن خو ھەنە، هه‌كه گەلەک یا پێدڤی نەبیت نە ھێتەکرن باشترە، گەلەک کلینیکان دەرزیێن فیلەر و بوتوکسان دئینن کو ب کوالێتیەکا گەلەک کێمن و دخرابن دڤێت ژ لایێ حکومەتێ ڤە چاڤدێری ل سەر بھێتەكرن.
خانی نیوز، مەنیجا ئەیوب
