بالیۆزخانه‌یا ئه‌مریكا ل به‌غدا راگه‌هاند، ژ ئه‌گه‌رێ هێرشا مۆشه‌كا شڤێدى ل سه‌ر بالیۆزخانه‌یا وان، زیانه‌كا كێم هه‌بوویه و سیسته‌مێ به‌رگریا مۆشه‌كان ژى به‌رسڤا وێ هێرشێ دایه.
بالیۆزخانه‌یا ئه‌مریكا ل به‌غدا ئاشكرا كر، د وێ هێرشا مۆشه‌كان دا چ زیانێن گیانى نه‌بووینه، لێ ل گۆره‌ى ئاگاهیێن وان ل ده‌ڤه‌رێن سڤیل ل ده‌ردۆرا بالیۆزخانێ زیان هه‌نه و دبیت بریندار د ناڤ وه‌لاتیان دا هه‌بن.
بالیۆزخانه‌یا ئه‌مریكا دوپات ژى كر، ئه‌و هێرش زێده‌گاڤینه ل سه‌ر سازیێن دبلۆماسى و بنپێكرنها قانوونێن ناڤده‌وله‌تى یه و زێده‌گاڤیه‌كا راسته‌خۆیه ل سه‌ر سه‌روه‌رییا ئیراقێ، داخواز ژى ژ هه‌موو سه‌ركردێن سیاسى یێن ئیراقى و حكومه‌تێ كر گاڤێن رژد بۆ رێگرتنێ ل وان جۆره هێرشا بهاڤێژن و لێپرسینێ د گه‌ل هێرشكه‌ران بكه‌ن.
ژ ئالیێ خوه‌ڤه شانه‌یا راگه‌هاندنا ئێمناهییێ یا ئیراقى راگه‌هاند، گرۆپه‌كێ ژ قانوونێ ده‌ركه‌فتى هه‌ژماره‌كا مۆشه‌كان ئاراسته‌ى بالیۆزخانه‌یا ئه‌مریكا ل ده‌ڤه‌را زۆنا كه‌سك ل به‌غدا كرینه، ل گۆره‌ى ئاگاهییان وان ژى ئه‌و مۆشه‌ك ژ سه‌ربازگه‌ها ره‌شید هاتینه هاڤێتن و هنده‌ك مۆشه‌ك كه‌فتینه ده‌ڤه‌رێن سڤیل.
