سه‌رۆكاتییا هه‌رێما كوردستانێ هێرشا شڤێدى ل سه‌ر بالیۆزخانه‌یا ئه‌مریكا ل به‌غدایا پایته‌ختێ ئیراقێ شه‌رمزار كر و راگه‌هاند، ئه‌و جۆره هێرش دژى به‌رژه‌وه‌ندی و سه‌روه‌رییا ئیراقێ نه.
سه‌رۆكاتییا هه‌رێما كوردستانێ د به‌یانه‌كێ دا هێرشا ل سه‌ر بالیۆزخانه‌یا ئه‌مریكا ل به‌غدا شه‌رمزار كر و راگه‌هاند، دوباره‌بوون و به‌رده‌وامییا وان جۆره هێرشان ل سه‌ر بالیۆزخانه و نوونه‌راتیێن دبلۆماسى یێن وه‌لاتان، دژى به‌رژه‌وه‌ندیێن ئیراقێ و سه‌روه‌رییا وى وه‌لاتى یه، هه‌روه‌سا دژى قانوونێن ناڤده‌وله‌تى یه و دێ ئه‌نجامێن خراب هه‌بن و په‌یوه‌ندیێن ئیراقێ د گه‌ل وه‌لاتێن جیهانێ ئێخیته مه‌ترسیه‌كا راسته‌قینه.
ل گۆره‌ى به‌یانا سه‌رۆكاتییا هه‌رێما كوردستانێ، ئه‌ركێ حكومه‌تا ئیراقێ یه ئاساییش و سلامه‌تییا سازیێن دبلۆماسى یێن وه‌لاتان و سه‌ر و مالێ وه‌لاتییان بپارێزیت، هه‌موو رێكارێن پیدڤى ژى بگریته به‌ر كو ئه‌و هێرش دوباره نه‌بن و هێرشكه‌ران ببینن و بده‌نه ده‌ستێ دادگه‌هێ و بگه‌هن سزایێ خوه.
