ئێکەتییا ئەورۆپا داخواز ژ تورکیا کر پێگیریێ ب بریارا دادگەھا مافێن مرۆڤی ئەوروپا بکەت و سەلاحەددین دەمیرتاش، ھەڤسەرۆکی بەرێ یێ ھەدەپێ ئازاد بکەت.
نابیلا ماسرئالی، پەیڤدارێ سیاسەتا دەرڤەیا ئێکەتییا ئەورۆپا راگەھاند، دادگەھا مافێن مرۆڤی ل ئەورۆپا داخوازا ئازادکرنا دەمیرتاشی کرییە، ژبەرکو یێ بێ تاوانە.
نابیلا ماسرئالی دیارکر، تورکیا وەکو وەلاتەکێ بەربژار بۆ ئەندامەتییا ئێکەتیا ئەورۆپا پێدڤییە رێزێ ل مافێن مرۆڤی بگریت.
پێشتر دادگەھا مافێن مرۆڤی ل ئەورۆپا راگەھاند بوو، چ بەلگەیێن دروست بەردەست نینن کو سەلاحەددین دەمیرتاشی ب تۆمەتا تیرۆرێ سزا بدەن، بەلکو سزادانا وی بریارەکا سیاسی ل پشت ھەیە.
سەلاحەددین دەمیرتاش د چارچوڤێ ڤەکۆلینێن تیرۆرێ دا ل رۆژا چاری چریا دویێ یا سالا ٢٠١٦ێ ھاتیە دەستەسەرکرن و تا نھا د زیندانا ئەدیرنە دایە.
دادگەھا مافێ مرۆڤی ئەوروپا ل رۆژا ھەژدەی چریا ئێکێ یا سالا ٢٠١٨ داخوازا ئازادکرنا دەمیرتاشی کربوو، لێ تورکیا پابەندی بریارێ نەبوو.
