پارتییا دیمۆكراتیك یا گه‌لان هه‌ده‌پێ راگه‌هاند، د ده‌مێ چار سالێن بوورى دا بیست هزار ئه‌ندام و ئالیگرێن وان هاتینه ده‌سته‌سه‌ركرن و سزایێ زیندانكرنێ ژى ب سه‌ر ده‌هـ هزار كه‌س ژ وان هاتییه سه‌پاندن.
پارتییا دیمۆكراتیك یا گه‌لان هه‌ده‌پێ راپۆرتا خۆه ل سه‌ر بنپێكاریێن مافێ مرۆڤى ل سالا 2020 به‌لاڤكرییه و تێدا به‌حسێ هێرشێن سه‌ر هه‌ده‌پێ كرییه، د راپۆرتا هه‌ده‌پێ دا هاتییه، هه‌ده‌په ل سه‌ر به‌رخوه‌دانا خۆه دژى بنپێكاریێن مافێ مرۆڤى به‌رده‌وامه.
ل گۆره‌ى راپۆرتا هه‌ده‌پێ، ل سالا 2015، سێ هزار ئه‌ندام و په‌رله‌مانتار هاتینه زیندانكرن، بتنێ ل سالا 2020 هزار و حه‌فتسه‌د و پێنجى ئه‌ندام و رێڤه‌به‌رێن وان هاتینه ده‌سته‌سه‌ركرن و سزایێ زیندانكرنێ ب سه‌ر سه‌د و حه‌فتێ و دو كه‌سێن ژ وان هاتییه سه‌پاندن. د هه‌مان ده‌م دا، ده‌ست ب سه‌ر چل و هه‌شت باژێرڤانییان دا هاتییه گرتن ژلایێ قه‌یوومان ڤه.
ده‌ستبسه‌رداگرتنا باژێرڤانییان ب رێیا سه‌پاندنا قه‌یوومان ل سالا 2019 ده‌ستپێكر و ل سالا 2020 ژى یا به‌رده‌وام بوو، تا نها سیهـ و حه‌فت هه‌ڤسه‌رۆكێن باژێرڤانییان سه‌ر ب هه‌ده‌پێ ڤه سزایێ زیندانكرنێ ب سه‌ر دا هاتییه سه‌پاندن، چل و هه‌شت باژیرڤانیێن هه‌ده‌پێ ژى قه‌یووم ب سه‌ر دا هاتینه سه‌پاندن و هه‌ڤده هه‌ڤسه‌رۆكێن باژێرڤانییا یێن سه‌ر ب هه‌ده‌پێ ڤه‌د زیندانێ دا نه.
