ئەندامەکێ لژنا مافێن مرۆڤی یا ئیراقی سالا دوھزار و بیستێ ب سالەکا کارەساتبار و پر توندوتیژی بۆ ئیراقی ب ناڤ کر و راگەھاند، د سالا دوھزار و بیستێ دا ئامارێن ب ترس ھاتینە تۆمارکرن.
فازل غەرراوی، ئەندامێ لژنا مافین مرۆڤی ل ئیراقێ د بەیانەکێ دا راگەھاند، سالا دوھزار و بیستی ئامارێن ب ترس ل ئیراقێ ھاتینە تۆمارکرن، ب رەنگەکی حالەتێن خوەکوشتنێ گەھشتینە سیسەد و سیھـ و سێ کەسان و ژ وانا حەفتێ و ئێک حالەت ل بەغدا ھاتینە تۆمارکرن و ل بەسرا ژی چل و نەھـ حالەت.
غەرراوی ئاشکرا کر، ئەو کەسێن ل سەر دۆسەیا کێشان و بکارئینان و بازرگانیکرن ب ماددێن ھشبەر ھاتینە دەستەسەرکرن، ھەژمارا وان ھەشت ھزار و حەفتسەد و حەفتێ و حەفت کەس بوو، شێست و چار ھزار و سێسەد و دو کەس ژی ل سەرانسەری ئیراقێ ھاتینە حوکمکرن و زیندانکرن.
فازل غەرراوی، ئەندامێ لژنا مافین مرۆڤی ل ئیراقێ دوپات ژی کر، پێنجسەد و ھەشتێ و ئێک کەس ژ وەلاتیێن سڤیل و کارمەندێن سەربازی د روودانێن مەھا چریا ئێکێ یا سالا بووری دا گیانێ خوە ژ دەست دایە، بیست و پێنج ھزار و سێسەد کەس ژی بریندار بووینە، ھەروەسا حەفتێ و ھەشت چالاکڤان و رۆژنامەڤان و میدیاکار ھاتینە کوشتن و بووینە ئارمانج.
غەرراوی ئاشکرا ژی کر، سالا دوھزار و بیستێ، چار ھزار و نەھسەد تاوانێن کوشتنێ ھاتینە تۆمار کرن، ھەردو سالێن بووری ژی ھەشتێ و حەفت ھزار و ھەشتسەد و حەفتێ و ئێک حالەتێن بەردانا ھەڤژینان، پازدە ھزار حالەتێن توندوتیژیا خێزانی ژی ھاتینە تۆمارکرن.
