گۆلیزار سندی: ھەموو داھات ناچیتە گەنجینا حکومەتێ

جێگرا سەرۆکێ لژنا سامانێن سروشتی ل پەرلەمانێ کوردستانێ راگەھاند،، بزاف ل بەغدا ھەنە رێککەفتن دناڤبەرا ھەولێرێ و بەغدایێ دا نەھێتەکرن، لێ ستراتیژیەتا حکومەتا ھەرێما کوردستانێ یە ل سەر دانوستانان بەردەوام بیت، ھەکە نەگەھشتین رێککەفتنێ ژی دێ پلانا دویێ بجھئینن، ئەوژی رێکخستنا داھاتێ ناڤخوە و پێداچوونە ب کەرتێ پەترۆلێ.
گۆلیزار سندی، جێگرا سەرۆکێ لیژنا سامانێن سروشتی ل پەرلەمانێ کوردستانێ د ھەڤدیتنەکا خانی نیوز دا ئاشکراکر، پەسەندکرنا قانوونا کورتئینانا دارایی ژلایێ جڤاتا نوونەرێن عێراقێ ڤە زەنگەکا مەترسیدار بوو ھمبەر ھەرێما کوردستانێ، ئالیێن عێراقی وەک کارتەکا فشارێ ھەموو پرسەکێ ھمبەری ھەرێما کوردستانێ بکار دئینیت.
گۆلیزار سندی ئاشکرا کر، ستراتیژیەتا حکومەتا ھەرێما کوردستانێ رێکەفتنە دگەل بەغدا، بەلێ بەغدا پێگیریێ ب دستووری ناکەت، سەرەرای وێ یەکێ ژی ھەرێما کوردستانێ دێ ل سەر دانوستانێن دگەل بەغدا بەردەوام بیت.
ل دۆر بجھئینانا پلان بی گۆلیزار سندی گۆت: د پلانا بی دا ھەرێما کوردستانێ دێ پێداچوونێ ب داھاتێ ناڤخوە کەت و چاکسازیێ د ھەموو بیاڤان دا بکەت، ژبەرکو نھا ھەموو داھاتێ خالێن سنۆری ناچیتە د سندۆقا حکومەتێ دا، ئەو یەک ژی ئاریشەیەکا مەزنە، ھەروەسا دڤێت داھاتێن ناڤخوە بھێنە رێکخستن و ئیدی ھەرێما کوردستانێ پشت ب داھاتێ ناڤخوە ببەستیت.
گۆلیزار سندی ئەو یەک ژی ئاشکراکر، بریارە چاکسازی د کەرتێ پەترۆلێ دا ژی بھێتەکرن، نەخاسمە گرێبەستێن پەترۆلێ یێن دگەل کۆمپانیا ھاتینە ئیمزاکرن، وان ژی وەک لژنا سامانێن سروشتی تێبینی ل سەر کرێیا کۆمپانیان ھەنە.
خانی نیوز، قائید میرۆ، ھەولێر:
 https://www.youtube.com/https://www.youtube.com/watch?v=t8ntdZ15j-A&feature=youtu.be&fbclid=IwAR2EeSTaIyx0Cs8VDd9OewcKGROQ5SAAxvPzvv23JjvoqfuS3OZSxTueY1gwatch?v=XHOmBV4js_E