په‌یڤدارێ حكومه‌تا هه‌رێما كوردستانێ راگه‌هاند، كو حكومه‌تا هه‌رێما كوردستانێ رێكخستنێ بۆ داهات و خه‌رجییان دكه‌ت، هه‌ر ده‌مێ داهات هاته كۆمكرن دێ ده‌ست ب دابه‌شكرنا مووچه‌ى كه‌ین.
د كونگره‌كێ رۆژنامه‌ڤانى دا، جۆتیار عادل په‌یڤدارێ حكومه‌تا هه‌رێما كوردستانێ راگه‌هاند: د كۆمبوونا جڤاتا وه‌زیران دا وه‌زیرێ پلاندانانێ و دارایى كۆمه‌كا پێشنیاران پێشكێشكرن، كو به‌حسێ داهاتى و رێكخستنا وێ كرییه، ئه‌و ژى د چوارچۆڤێ پرۆژه قانوونا بودجا 2021ێ.
ناڤهاتى راگه‌هاند ژى: حكومه‌تێ باوه‌رى ب وێ چه‌ندێ هه‌یه كو ئه‌ڤ جۆره پرۆژه قانوونه بۆ ب ده‌ستڤه‌ئینانا شه‌فافیه‌ت و دادپه‌روه‌ریێ دگرنگن و به‌رى زێده‌تر ژ هه‌یڤ و نیڤان هه‌ردوو وه‌زاره‌ت هاتبوونه راسپاردن.
جۆتیار عادل گۆت ژى: قاچاخچیكرنێ كاریگه‌رى ل سه‌ر داهاتێ هه‌رێما كوردستانێ بێ جوداهى دروستكرییه و دڤێت ل هه‌ر جهه‌كى بهێته بنبر كرن، بۆ ڤێ ره‌وشێ ژى دێ بزاڤێن باش هێنه كرن و پێدڤییه هه‌موو د هاریكاربن.
دیار كر ژى كو ل ده‌ستپێكا ده‌ستبكاربوونا كابینا نه‌هێ ئارمانجا سه‌ره‌كى ئه‌وه كو دگه‌ل حكومه‌تا ئیراقێ رێكبكه‌ڤین.
سه‌باره‌ت مووچه‌یێ فه‌رمانبه‌ران ژى، جۆتیار عادلى گۆتى: ئه‌م وه‌ك حكومه‌تا هه‌رێمێ به‌رى نوكه مه تائكید كرییه كو دێ كارێن ده‌ستپێكى یێن حكومه‌تێ دابینكرنا مووچه‌ى بیتن، حكومه‌تا هه‌رێمێ خه‌لكێ هه‌رێما كوردستانێ پشت راست دكه‌ت كو ده‌ستپێكا كارێن وان دێ مووچه بیت، د چوارچووڤێ ئاماده‌كاریێن وه‌زاره‌تا دارایى ژى ل ڤان نێزیكان بابه‌تێ دابه‌شكرنا مووچه‌ى دێ ئاشكرا كه‌ن.
