فەرھاد سالح ئێک ژ وەلاتیێن سنورێ قەزا ئامێدیێ یە، خودان تەرش و کەوالە بۆ خانی نیوز گۆت: چەندین سالە کارێ خودانکرنا تەرش و کەوالی دکەت لێ تاکو نھا چو مفا ژێ نەدیتییە و دیارکرژی: ل ڤێ دەڤەرێ خودانکرنا تەرش و کەوالی گەلەکا بزەحمەتە ژبەرکو حکومەتا ھەرێما کوردستانێ چو ھاریکاری و پشتەڤانییا وان ناکەت و ھەمی خزمەتا تەرش و کەوالی ل سەر کیستێ وانە، ئەڤەژی دبیتە بارگرانی ل سەر ملێن وان و ھند جاران ژی زەرەرمەند دبن، چونکە کرینا ئالفێ وان گەلەک یێ گرانە مینا جھ و ئار و عەلەفێ تورکی و ئیرانی، ئەگەر حکومەتێ نیف بھا دابا مە داشێین بەردەوامیێ بکارێ خوە دەین.
حەربی عەبدولا ئێکە ژ خودانکەرێن پەزی دبێژیت: ل دەستپێکا زڤستانێ تاکو بھارێ دڤێت ھەموو پەزێ مە د گوڤێن خوەڤە بھێنە ب خودانکرن، ئەڤە ژھی پێدڤی ب مەزاختنەکا زۆرە بۆ دابینکرنا ئالف و دەرمانێن وان.
حەربی گۆت ژی: ئەو رۆژانە ل راگەھاندنێ دبینن و گوھ لێ دبن کو حکومەت دبێژیت ئەم ھاریکاریا جۆتیارێن خۆ دکەین، لێ تاکو نوکە حکومەتا مە ئێک کیلۆیا ئالیکێ ئاژەلان نەدایە وان، ئەرێ ھاریکاریا حکومەتێ ل کیڤەیە؟
ناڤھاتی گۆت ژی: تاکو نھا چو کارگەھێن وەرگرتنا شیری ل ڤێ دەڤەرێ نینن داکو خەلک بشێت ئاژەلان ب خودن بکەت، مە زەرەر یا ژ خودانکرنا پەزی دیتی و مە مفا ژێ نەدیتییە.
ژلایێ خوەڤە ئەندازیار ھەکار حەمید رێڤەبەرێ رێڤەبەریا چاندنا ئامێدیێ دا دیارکرن، پتر ژ ۳۰ پڕۆژەیێن خودانکرنا ئاژەلان یێن کو برێکا رێڤەبەریا وانڤە دانای ل سنورێ قەزا ئامێدیێ ھەنە، ئەو ژی یێن ب خودانکرنا ماسی و مریشک و پەزی و گارەشانە و گوت: خودانێن ڤان ھەمی پڕۆژان مفایەکێ باش ژێ دبینن.
دەربارەی ھاریکارییان ھەکار حەمیدی گۆت: ژبەر قەیرانا دارایی ئەوا ب سەر ھەرێما کوردستانێ دا ھاتی ھاریکاریێن حکومەتێ کێم بوینە، وان ژی وەک رێڤەبەریا چاندنا ئامێدیێ ھاریکاریەکا باش بۆ وان دابینکرینە وەک ئالفی بۆ وان پڕۆژان.
ئەندازیاری گوت ژی: دەڤەرا مە دەڤەرەکا ناڤ چیایی یە، پیش و پاوانەکێ زۆر و ئاقارەکێ بەرفرەھ ل ڤێ دەڤەرێ ھەیە، ھەرکەسێ حەزا ب خودانکرنا ئاژەلی ھەبیت دێ ب رەنگەکێ زۆرباش و ب سەرکەفتیانە ب خودان کەت و دێ مفایەکێ باش ژێ بینیت، چونکە ئەڤ دەڤەرە وەک دەڤەرێن دەشتێ نینە، تاکو بەفر دباریت ئاژەل دشێن ل دەڤێ بچەرن.
خانى نیوز، ئیقبال عومه‌ر
