نڤیسکارەکێ ناڤدارێ تورک و دۆستێ دێرینێ گەلێ کوردستانێ د گۆتارەکێ دا رەخنە ل پارتییا کارکەرێن کوردستانێ پەکەکێ گرتن و راگەھاند، پەکەکە شیایە خوە د گەل قانوونێن تورکیا و ئەورۆپا بگونجینیت، لێ دژاتیا قانوونێن ھەرێما کوردستانێ دکەت و دخوازیت قەوارێ ھەرێمێ ژناڤ ببەت.
ئسماعیل بشکچی، نڤیسکارێ ناڤدارێ تورک و دۆستێ دێرینێ گەلێ کوردستانێ د گۆتارەکێ دا ل ژێر ناڤێ (من کار ب وان کەسان نینە یێن دبێژن کوردستانێ پێدڤی ب دەولەتێ نینە) ئاشکرا کر، پەکەکێ ل وەلاتێن وەکو ئەلمانیا، ھۆلەندا، فرەنسا و سوێدێ خوە د گەل قەوارە و قانوونێن وان گونجاندیە، ھەروەسا ل جھێن وەکو ستەنبۆلێ، ئزمیرێ، بۆرسایێ، ئەدەنە و مێرسینێ ژی گەلەک کوردان پەیوەندی د گەل پەکەکێ ھەنە، ل وان جھان ژی ب شێویەکێ سروشتی پەکەکە پێگیریێ ب قانوونێن دەولەتا تورکیا دکەت، ھەروەسا ل باژارێن باکورێ کوردستانێ ژی ھەمان حال ھەیە، لێ پەکەکە پێگیریێ ب قانوون و رێنمایێن حکومەتا ھەرێما کوردستانێ ناکەت، دخوازیت ژی قەوارێ ھەرێمێ بچووک بکەت و بشکێنیت.
بشکچی ل دۆر ھەلویستێ دژبەراتییا پەکەکێ بۆ ھەرێما کوردستانێ گۆت: ئەو رەوشەکا پەیوەندیدارە ب ھەلویست و سەردەری و رۆحیەتا مرۆڤی بندەست، خەلکێ بندەست خوە دگونجینیت و ملکەچی وان رێنمایی بیت یێن ژ دەرڤە دھێنە ئاراستەکرن، دەمێ تەخەکا خەلکێ وان ژی دەستھەلاتەکێ دروست بکەن، دێ بەرھنگار بن و بۆ خوە ب کێماسی دزانن، لەورا بزاڤا ژناڤبرنا وێ دەستھەلاتێ دکەن، ژبەرکو دەولەتا دەستھەلاتدار ئەو وەسا فێرکرینە.
ئسماعیل بشکچی، نڤیسکارێ ناڤدارێ تورک گۆت ژی: ئەو کەسێن رەخنێ ل وی دگرن بلا بێژنە پەکەکێ، حکومەتا ھەرێما کوردستانێ قەوارە و قانوون و رێنمایێن خوەیێن تایبەت ھەنە و پێدڤییە ھوون پێگیریێ پێبکەن، ھێرشێ نەکەنە سەر پێشمەرگەی و بارەگەھین پارتی دیمۆکراتی کوردستان، بلا بیژنە پەکەکێ ھوون چاوا پێگیریێ ب قانوونێن دەولەتا تورکیا و وەلاتێن ئەورۆپا دکەن وەسا پێگیریێ ب قانوونێن ھەرێما کوردستانێ ژی بکەن.
بشکچی د پشکەکا دی یا گۆتارا خوەدا گۆت: سوپایێ تورکیا ل گەلەک جھێن ئاخا ھەرێما کوردستانێ بنگەھێن سەربازی دروست کرینە، د دەمەکی کو پێدڤییە پەکەکە بزاڤا دوورخستنا وان بکەت، بەھانەیێن جودا دگریت و رێ بۆ پتر بنەجھکرنا سوپایێ تورکیا خۆش دکەت، یا ئاشکرا یە ژی کو سوپایێ تورکیا گەفەکا مەزنە ل سەر ھەرێما کوردستانێ.
