پارێزگارێ پێشتر یێ نه‌ینه‌وا هۆشدارى ژ ره‌وشا ئیراقێ دان و راگه‌هاند، ره‌وشا ئیراقێ وه‌كو به‌ره‌كى یه ژ سه‌رێ چیای بكه‌ڤیته خوارێ.
ئه‌سیل نوجه‌یفى، پارێزگارێ پێشتر یێ نه‌ینه‌وا د په‌یجێ خوه‌یێ تۆرا جڤاكییا فه‌یسبووكى دا ئاشكرا كر، ره‌وشا ئیراقێ وه‌كو به‌ره‌كی یه كو ژ سه‌رێ چیایى بكه‌ڤیته خوارێ و كه‌س نه‌شێت راگریت، ب تنێ ب شكاندنێ ئه‌و به‌ر دێ هێته راگرتن یان ژى هه‌تا دكه‌ڤیته د بنێ چاله‌كێ دا.
به‌رى چه‌ند رۆژان ژى ئه‌سیل نوجه‌یفى، پارێزگارێ پێشتر یێ نه‌ینه‌وا راگه‌هاند بوو، هه‌كه ئاقلێ پێكهاته‌یا شیعه یێن ب ساخله‌تێ پرانیێ ده‌ستهه‌لاتێ ل وه‌لاتى دكه‌ن، سیسته‌مه‌كێ مه‌ده‌نى پێشكیش نه‌كه‌ن، سیسته‌مێ ده‌وله‌تا ئیراقێ دێ ژناڤ چیت.
د ده‌مێن بوورى دا گه‌له‌ك سیاسه‌تمه‌دار و چاڤدێرێن سیاسى هۆشدارى ژ ژناڤچوونا سیسته‌مێ سیاسى و ده‌وله‌تا ئیراقێ داینه، ژبه‌ركو د هه‌ژده سالێن بوورى یێن حوكمرانییا شیعان دا، ئیراق نه‌شیایه چو سیسته‌مێن سیاسى و ئابوورى یێن سه‌ركه‌فتى په‌یره‌و بكه‌ت و رۆژ بۆ رۆژێ ره‌وشا ئیراقێ به‌ر ب خرابتر دچیت.
