پشتی بویەرێن ١٦ی ئکتوبەرێ پارتیا دیمۆکراتا کوردستانێ ھەموو بارەگایێن خوە ژ وان دەڤەران ڤەکێشان یێن کو گرۆپێن شیعی لێ بالە دەست و پارێزگەھا نینەوا ژی ئێک ژ وان دەڤەران بوو، بەرپرسێ لقا ١٤ یا پارتی ل مووسلێ دیار دکەت کو ئەو ڤەناگەرنە وی باژاری ھندی ئەو ھێز و گرۆپێن چەکدار ل وێرێ بن.
عەلی خەلیل، بەرپرسێ لقا ١٤ یا پارتی دیمۆکراتی کوردستان تایبەت بۆ خانی نیوز دیار کر، رۆژانە کادر و پێشمەرگەیێن وان ل وان دەڤەرێن گرۆپێن شیعی لێ بالە دەست دھێنە گرتن و دووڤچوون ل سەر دھێتەکرن، ئانکو ھەموو دەرگەھـ ل مووسلێ ل پارتی دگرتینە، لێ ئەو رێگری ھەموو نە بووینە ئەگەر کو ئەو دەستان ب داھێلین و پشتا خوە بدەنە کادر و ئەندامێن خوە.
عەلی خەلیل گۆت ژی: پارتی دزانیت ئەگەر ب ئەڤی شێوەیێ ھەیی ڤەگەریت دێ ئەو گرۆپ ئالۆزیان دروستکەن، لەو وان بریار دایە بۆ پارستنا گیانێ کادر و ئەندامێن خوە جارێ ھەتا ئەو ئالیێن بیانی ژ مووسلێ دەرنەکەڤن ئەو ژی ڤەناگەرن و پارتی دێ ل وی دەمی ڤەگەریت خەلکێ مووسلێ ب گولان پێشوازیێ لێبکەت.
بەرپرسێ لقا ١٤ یا پارتی ئاماژە کر، نھا پارتی یا قەبوولکری نینە ل نک وان گرۆپێن شیعی، ژبەر وێ یەکێ ژی ھەر ئەندامەکێ وان بەرپرسێ جھەکی بیت ب ھەموو شێوازان دژاتی لێ دھێتەکرن و دھێتە دەرکرن ژ پۆستی وی، ژبەرکو ئەو گرۆپ نوکە دەستھەلاتێ ل مووسلێ دکەن.
عەلی خەلیل، بەرپرسێ لقا ١٤ یا پارتی دیمۆکراتی کوردستان گۆت ژی: ئەگەر رێگریێن گرۆپێن حەشدێ نەبن، پارتی دێ دەنگێن ئێکێ ل ئەوان دەڤەران ئینیت، لێ دەمەکە دەست ب رێگریێ ھاتیەکرن و ب ھەموو شێوەیەکی کار دھێتەکرن بۆ ھندێ کارتێن دەنگدانێ یێن کوردان نەھێنە دروستکرن و بنگەھێن دەنگدانێ ل دەڤەرێن جەماوەرێ پارتی لێ کێمکرینە.
بەرپرسێ لقا ١٤ یا پارتی دیار دکەت: ھەر دەمێ سەرکردایەتیا وان بریارا ڤەگەریانێ دا ئەو بەرھەڤن و خواست ب زوترین دەم ئەو ھێزێن نوکە ھەین ل مووسلێ کو خەلکێ وێ ب داگیرکەر و بیانی دبینن، ڤەگەرنە جھێن خوە یێن دروست کو ناڤەراست و باشوورێ ئیراقێ نە و بھێلن کو پۆلیس و لەشکرێ ئیراقێ پارستنا وان دەڤەران بکەن کو ئەڤە ئەو رێکەفتنە یا پشتی شەرێ داعش ھاتیەکرن.
عەلی خەلیل بۆ خانی نیوز: پارتی دێ ب سەربلندی ڤەگەریتە مووسلێ
