وەزارەتا ناڤخوەیا ھەرێما کوردستانێ راگەھاند، ژبۆ پاراستنا ئاساییشا ساخلەمی یا ھەرێما کوردستانێ، قەدەغەیا ھاتنوچوونێ د گەل 21 وەلاتان رادگەھینن و ژ وانا بریتانیا، فرەنسا، گۆرجستان، ئەلمانیا، ئەمریکا، ئوسترالیا، ھۆلەندا و ژاپۆن.
وەزارەتا ناڤخوەیا ھەرێما کوردستانێ د بەیانەکێ دا راگەھاند، ئەو قەدەغە شڤێدی سەعەت دوازدە نیڤا شەڤێ کەفتیە د وارێ بجھئینانێ دا.
ل گۆرەی بەیانا وەزارەتا ناڤخوە، ھاتنوچوونا گەشتیاران ل دەریێن سنۆریێن حاجی ئۆمەران، باشماخ و پەروێزخان دێ ئاسایی بن، دەریێ سنۆریێ حاجی ئۆمەران ژی د بەیانەکێ دا راگەھاندییە، شڤێدی سەعەت دوازدە رێ ل بەر وەلاتیێن ھەرێمێ ھاتیە ڤەکرن بۆ سەرەدانا ئیرانێ و وەلاتیێن ئیرانێ بۆ ھەرێما کوردستانێ و ل گۆرەی رێنمایێن ساخلەمی و پشکنینا ڤایرۆسێ کۆرۆنایێ.
وەزارەتا ناڤخوەیا ھەرێما کوردستانێ ئاشکرا ژی کر، ھاتنا وەلاتیێن بیانی ژی ژ وەلاتێن ناڤێن وان د لیستێ دا قەدەغەیە، لێ ئەو بریار ئاژانس و رێکخستنێن نەتەوەیێن ئێکگرتی، رێکخستنێن ناڤدەولەتی، ھەڤپەیمان و دبلۆماتکار و شاندێن فەرمی ڤەناگریت و رێ بۆ وان ل گۆرەی رێنمایێن ساخلەمی ڤەکرییە.
