دەزگەھێ گشتیێ کاروبارێن مینان ل ھەرێما کوردستانێ راگەھاند: ل سالا ٢٠٢٠ێ ب ئەگەرێ مینان ١٠ وەلاتییان ل ھەرێما کوردستانێ گیانێ خۆ ژ دەست داینە و ٨ ژی بریندار بووینە.
ئەڤرۆ دوشەمبی ١٨-١-٢٠٢١ێ د پرێسکونفرانسەکی دا جەبار مستەفا رەسوول، سەرۆکێ دەزگەھێ گشتیێ کاروبارێن مینان ل ھەرێما کوردستانێ راگەھاند: ل سالا ٢٠٢٠ێ ب گشتی ٣٦٠ ھزار و ٦٩٦ مەترێن دووجایی یێن زەڤییان ل ھەرێما کوردستانێ ژ مینان ھاتینە پاقژکرن و ھزار و ١٧٢ مین ھاتینە ژناڤبرن کو ھزار و ١٥١ دژی مرۆڤان بوون و ٢١ ژی دژی تانکان بوون، ھەروەسا ٧ ھزار و ٣٠٠ پارچە تەقەمەنی و ١٧ کەرستھیێن تەقەمەنیێ ب شێوێ سەر پێ ھاتنە ژناڤبرن.
سەرۆکێ دەزگەھێ گشتیێ کاروبارێن مینان گۆت ژی: ھەر د وێ سالێ دا چوار کێلگەیێن مینان ھاتنە پاقژکرن و ٢٧ کێلگە ژی ھاتینە رادەستکرن کو ئێک ژ ملیۆن مەترێن دووجایی پترە، چوار خۆلێن راھێنانان ڤەکرینە و ٢٣ ھزار و ٣٠٦ وەلاتییان مفا ژێ وەرگرتبوون و ٣٦١ جاران ژی ژلایێ رێکخراوان ڤە سەرەدانا کارێن دەزگەھێ مینان ھاتییە کرن و ١٣ مولەت ژی بۆ رێکخراو و کۆمپانیێن نوو ھاتینە دان.
ھەروەکو سەرۆکێ دەزگەھی ئاماژە بۆ کری کو ژ سالا ١٩٩١ێ ھەتا نوکە ١٣ ھزار و ٥٠٠ کەسان ل کوردستانێ ب ئەگەرێ مینان بوونە قوربانی.
