سەرۆکا فراکسیۆنا پارتی دیموکراتی کوردستان ل پەرلەمانێ ئیراقێ راگەھاند، بریارە د ڤێ حەفتیێ دا پەرلەمانێ ئیراقێ بگەھیتە وان ماددان کو دێ بەحسا پشکا ھەرێما کوردستانێ کەن، ئەو ژی ماددهیێن ١٠ و ١١ نە و دێ ھەموو بزاڤان ژی کەن کو پشکا ھەرێما کوردستانێ یا پاراستی بیت، و چ دەستکاری د وان ماددهیان دا نەھێنە کرن.
د. ڤیان سەبری، بۆ ماڵپەڕێ فەرمیێ پارتی یا دیموکراتا کوردستان گۆت: ڤێ حەفتیێ دەربارەیی پشکا ھەرێما کوردستانێ د پرۆژە یاسایا بودجەی دا دێ دەست ب گۆتوبێژان ھێتە کرن و وان وەکو فراکسیۆنێن کوردی گەلەک باش ژی خۆ بەرھەڤکرییە و دێ ھەموو بزاڤان کەن کو پشکا ھەرێما کوردستانێ یا پاراستی بیت.
سەرۆکا فراکسیۆنا پارتى ل پەرلەمانێ ئیراقێ دیاركر ژی: ھندەک گۆتوبێژێن دەستپێکی هاتینه كرن، لێ گۆتوبێژێن رژد بۆ دوماھیێ ھاتینە پاشخستن، ژبەر ھندێ د ڤێ حەفتیێ دا گۆتوبێژێن رژد دێ ھێنە کرن و لژنا دارایی و ھەموو لایەن ژی دێ پشتهڤانییا مافێن کوردان کەن.
ئەڤرۆ شاندەکێ دارایێ ھەرێما کوردستانێ ب مەرەما گۆتوبێژان ل سەر مافێن دارایی یێن ھەرێما کوردستانێ د بودجەی دا دێ سەرەدانا بەغدایێ کەن.
دەربارەی ڤێ چەندێ ژى، ئەحمەدج سەفار، بریاردەرێ لژنا دارایی ل جڤاتا نوونەرێن ئیراقێ راگەھاند، سەبارەت پشکا ھەرێما کوردستانێ د بودجا گشتی یا سالا ٢٠٢١ێ دا، ئەڤرۆ یا ھاتییە دەستنیشانکرن کو مێھڤاندارییا شاندەکێ ھەرێما کوردستانێ بھێتە کرن، بۆ ھندێ ژی داکو بگەھنە رێککەفتنەکێ.
