پشتى كو سترانبێژێ مللى (زوبیر سورچى) د سترانه‌كێ دا ناڤێ به‌رێ گاره‌ى ئینایه، ڤێ یه‌كێ ژى نه‌رازیبوونا خه‌لكێ وێ ده‌ڤه‌رێ ل دووڤ خۆ ئینا و د سۆشیال میدیایێ دا گه‌له‌ك ده‌نگڤه‌دا، د داخویانییه‌كێ دا زوبێر سورچى بۆ خانى نیوز راگه‌هاند: ئه‌و داخازا لێبۆرینێ ژ خه‌لكێ ده‌ڤه‌را به‌رێ گارێ دكه‌ت و مه‌ره‌ما وى ئه‌و نه‌بوویه وان كێم بكه‌ت و سڤكاتیێ ب وان بكه‌ت.
زوبێر سورچى بۆ خانى نیوز گۆتیه ژى: خه‌لكێ ده‌ڤه‌را به‌رێ گارێ خودان رێزن، ئه‌و كورد په‌روه‌رن و خوه‌دان دیرۆكه‌كا پاقژن و جهێ شانازییا وانن، وى ژ بۆ دلگرانكرنا وان ئه‌ڤ سترانه نه‌گۆتییه و ئه‌و لێبۆرینێ ژ خه‌لكێ به‌رێ گارێ دخوازیت و مه‌به‌ستا وى مرۆڤێن زه‌نگین و چاڤبرسی بوویه.
(ئه‌ڤین حوسێن) سه‌رۆكا سه‌ندیكا هونه‌رمه‌ندێن كوردستانێ تایێ دهۆكێ بۆ خانى نیوز گۆت: خه‌لكێ به‌رێ گارێ ب سه‌ندیكایێ راگه‌هاندییه كو ئه‌و دێ سكالایا یاسایی ل سه‌ر سترانبێژێ مللى تۆماركه‌ن.
پێشتر دڤیدیۆیه‌كێ سترانبێژى مللى یێ ده‌ڤه‌را ئاكرێ زوبێر سورچى ناڤێ خه‌لكێ به‌رێ گارێ ئینابوو. نه‌رازیبوونا خه‌لكێ وێ ده‌ڤه‌رێ ژى گه‌هشتیه وى راده‌ى كو هزر د تۆماركرنا سكالایێ دا بكه‌ن.
خانى نیوز، عه‌بدوللا عه‌لى
