بارەگایێ بارزانی ئەڤرۆ رۆژا دووشەمبی ٢٥-١-٢٠٢١ راگەھاندنەک بەلاڤکریە و تێدا ھاتییە: ئەڤرۆ رۆژا دووشەمبی ل سەلاحەدین سەرۆک مەسعود بارزانی پێشوازی ل شاندەکا ھەڤپشک ژ نوونەر و کونسولێن وەلاتێن عەرەبی ل ھەولێرێ کر، کو پێکھاتبوون ژ بالیۆز (نەزمی حزووری) کونسولێ گشتیێ فەلەستینێ و عەمیدێ سلکێ دیپلۆماسی لە ھەرێمێ، (د. عومەر ئەلکندەری) کونسولێ گشتیێ کوەیتێ و (ئەحمەد ئەلزاھری) کونسولێ گشتیێ ئیماراتێ و (محەمەد وەجیە حیجازی) کونسولێ گشتیێ مسرێ و (عەبدولرەحیم حەسەن) رێکخەرێ کاروبارێن کونسولخانا شاھاتییا ئۆردنێ ل ھەولێرێ.
راگەھاندنێ گۆتییە ژی: ئەو دیدار ب ھەلکەفتا سەرێ سالا نوو ھاتبوو سازکرن، نوونەر و کونسولێن وەلاتێن عەرەبی ل ھەولێر سلاڤ و رێزێن سەرۆک و ئەمیر و شاھێن وەلاتێن خۆ گەھاندنە سەرۆک بازرانی، ھەروەسا سوپاسیا سەرۆک بازرانی و ھەرێما کوردستانێ کرن ژ بۆ وێ پەیوەندییا دێرین و ھەڤالیینیا وان ل گەل وەلاتێن عەربی.
ھەروەسا دیاکریە ژی: شاندێ مێھڤان سوپاسدارێ ھەرێما کوردستانێ بوون کو د شەرێ دژی داعشێ دا مێھڤاندارییا سەدان ھزار ئاوارەیێن عەرەب کریە. ھەروەسا ئەو رۆلێ ھێزێن پێشمەرگەی د شکاندنا داعشێ دا بلند دنرخینن و خوازیارێ وێ یەکێنە ژی ئاریبشەیێن د ناڤبەرا ھەولێر و بەغدایێ دا ب دیالۆگێ بھێنە چارەسەرکرن.
ژلایێ خۆڤە سەرۆک بازرانی سوپاسییا شاندێ مێھڤان کر و راگەھاند: گەلێ کوردستانێ ھەردەم د بزاڤا وێ یەکێ دایە کو پەیوەندیێن ھەڤالینی ل گەل گەلێن ڤێ دەڤەرێ ھەبیت و بنەمایێن ئاشتی و پێکڤە ژیانێ بجھـ بینیت. دەربارەی پەیوەندیێن ھەولێر و بەغدایێ ژی بارزانی ئەو یەکە دووپاتکریە، کو پێدڤییە چارەسەری ب رێکا دیالۆگێ و ئاشتییانە بن و د چارچۆڤێ دەستور و رێگرتنێ ل پێگەھـ و قەوارەیێ ھەرێما کوردستانێ بن، ھەروەسا سەرۆک بارزانی جەخت ل بەرەفپێشبرنا پەیوەندیێن ھەرێم و وەلاتێن عەرەبی کریە.
