ب مەرەما ژ نێزیکڤە ئاگەھدار بوون ژ داخازی و کێماسیێن دەڤەرا بەردەرەش ئەڤرۆ چارشەمبی ٢٧-١-٢٠٢١ (دانا عەبدولکەریم حەمە سالح) وەزیرێ ئاڤەدانکرنێ و نیشتەجێبوونێ ل حکومەتا ھەرێما کوردستانێ سەرەدانا دەڤەردارییا بەردەرەش کر، دکۆمبوونەکێ دا دگەل (خەلیل مەحموود) دەڤەردارێ بەردەرەش گەنگەشە ل سەر پرۆژەیێن پێدڤی ھاتنە کرن.
د پرێسکۆنفرانسەکێ دا وەزیرێ ئاڤەدانکرنێ و نیشتەجێبوونێ راگەھاند: دەڤەرا بەردەرەش پێدڤی ب گەلەک پرۆژەیێن خزمەتگوزارییە، لێ ژبەر قەیرانا دارایی د شیان دا نینە وەکو پێدڤی بۆدجە بۆ ھەموو پرۆژەیان بھێتە دابینکرن، ب تنێ پرۆژەیێن گەلەک پێدڤی د ئەڤ سالە دا دێ ھێنە جێبجیکرن ئەو ژی پێدڤی ب زێدەتر ژ ١٦ ملیار دینارێن ئیراقییە.
ناڤھاتی گۆت ژی: وەزارەتا ئاڤەدانکرنێ و نیشتەجێبوونێ سۆزێ ددەین د ئەڤ سالە دا کوژمێ ١٦ شازدە ملیار و ٥٠٠ ملیۆن دیناران ژ بۆ دەڤەرا بەردەرەش ئامادەبکەین ژبۆ بجھئینانا ٩ نەھـ پرۆژەیان.
دانا عەبدولکەریم حەمە سالح وەزیرێ ئاڤەدانکرنێ راگەھاند ژی: دێ ھەمی بزاڤان کەین ژ بۆ دابینکرنا بودجەیا پێدڤی و نەھێلانا گرفتێن رێک و پران ل دەڤەرا بەردەرەش.
ل گۆری زانیاریێن خانی نیوز: ژ گرنگترین پرۆژەیێن د ئەڤ سالەدا دێ ھێنە چێکرن رێکا دناڤبەرا گوندێ (قەرەناز) ھەتا ناوچەدارییا (دارەتوو) و چێکرنا رێکا دارەتوو بۆ بەنێنان. ھەروەسا چێکرنا رێکێن پێنچ گوندێن سنورێ دەڤەرا بەردەرەش، ھەروەسا د ئەڤ سالەدا ھژمارەکا ئامێرێن تایبەت ب چێکرنا رێک و پران بۆ بۆ رێڤەبەرییا چێکرنا رێک و پرا ل ئاکرێ دێ ھێنە دابینکرن.
خانی نیوز، قەحتان بیھی
