(عەبدولحەمید رەمەزان) خودانێ پرۆژه‌یێ ب خودانکرنا مریشکانە ل سنورێ دەڤەرداریا ئامێدیێ بۆ خانی نیوز دیارکر، کو بو ماوێ پتر ژ ٤٥ رۆژانە ئەو مریشکان ب خودان دکەت، بەلێ مخابن کو تا نوکە نەھاتنە فرۆتن و چ بازار نینە و نەشێن بفرۆشن و گۆت: ژبەر بلندبوونا بھایێ دۆلاری بازارێ مریشکان د ڤی دەمی دا زۆر یێ لاوازە و دیسان بلند بوونا بھایێ دۆلاری کارتێکرنەکا خراب ل سەر کارێ وان کریە. ژبەرکو ئەو (چویچەلوک و غاز و عەلەف و دەرمان و گازا مووەلیدێ) ب دۆلارى دکرن، نوکە ئەو مریشکان ب فروۆشن دێ ب دینار ھێنە فرۆتن، لەورا ئەو تنێ د ڤان رۆژان دا نێزیکی (٤٠) ملیۆن دیناران زەرەر مەند بوویە.
ژلایێ خوەڤە ئەندازیارێ چاندنێ (ھەکار حەمید) رێڤەبەرێ چاندنا دەڤەردارییا ئامێدیێ گۆت: ل سنورێ دەڤەرداریا ئامێدیێ (۳۲) پرۆژێن ب خودانکرنا مریشکان ھەنە، بھایێ عەلەفێ پەلەوەران بلند بوویە ژبەرکو ئەو مادەیێن دھێنە دروستکرن ژبۆ عەلەفی ٨٠٪ ژدەرڤەی کوردستانێ دھێت وەکو (پرۆتین، تاقە، گەنمۆک، زەیت، گەنمە شامی)، ھەر تەنەکا عەلەفێ مریشکان سەد دۆلار یێن چوینە سەر، ھەروەسا تاکو جۆتیار دگەھینیتە جھێ کاری ژی پارێ کرێ لێ دھێتە مەزاختن، د ڤی دەمی دا زیانێن وان نە ب تنێ ژبەر بلندبوونا بھایێ دۆلارییە بەلکو د ڤی وەرزێ سەرمایێ دا پتر پێدڤی گەرمکرنا جھێ وان مریشکان و دابینکرنا کارەبێ یا بەردەوامن.
ناڤھاتی گۆت ژی: ئەو نەچارن گازوایلێ و غازێ بکار بینن، ھەروەسا ژبەر بلاڤبوونا ئێشان ل ڤی وەرزی، ئەو پرۆژە پێدڤی ب ڤاکسین و دەرمانان دبن و ئەڤە ژی ھەموو ژ دەرڤەی کوردستانێ دھێن و بلندبوونا بھایێ دۆلاری کارتێکرنەکا مەزن ل سەر بھایێ وان کریە.
ئەندازیاری ئەڤ یەک ژی دیارکر، حکومەتێ تا رادەکی رێگریێ ل ئینانا مریشکان ژدەرڤەی وەلاتی کریە داکو زیان نەگەھیتە جۆتیارێن کوردستانێ و گوت: هه‌روه‌سا حکومەتێ رێکەفتن دگەل عیراقێ کریە کو مریشکێن کوردستانێ بھێنە ھنارتن بۆ باژێرێن ژێریا عیراقێ، ئەڤ یەک ژی دێ بیتە ھۆکار کو جۆتیارێن مە مفای ژ کارێ خوە ببینن و بشێن بەردەوامیێ پێ بدەن، لێ یا ژ ھەموویێ باشتر ئەوە کو حکومەت رێگریێ ل ئینانا بەرھەمێ ژ دەرڤەی کوردستانێ بکەت چونکی بەرھەمێ ناڤخۆ تێرا بازارێ کوردستانێ ھەیە.
خانی نیوز، ئیقبال عومەر
