وه‌سا بریارە ھەردوو ده‌ڤه‌رداریێن زاخۆ و سۆران ببنە ئیداره‌یێن سەربەخۆ، ھەلگۆرد نەجیب ده‌ڤه‌ردارێ سۆران بۆ خانى نیوز راگه‌هاند: دەمەکێ درێژە خەلکێ وان ھەر دوو ده‌ڤه‌ردارییان داخوازا ئیدارەیێن سەربەخۆ دکەن و لژنەیەک ژى بۆ جێبەجێکرنا وێ بریارێ ھاتییە پیکئینان.
ھەلگۆرد نەجیب ده‌ڤه‌ردارێ قەزا سۆران بۆ خانی نیوز دیارکر: ئالیێن پەیدەندیدار داخوازیا خەلکێ وان ھەر دوو ده‌ڤه‌ردارییا ب رەوا زانییە، ژبەر وێ یەکێ ژی ب شێوەیەکێ ده‌ستپێكى بریار هاتییه دان ھەر دوو ده‌ڤه‌ردارى ببنە ئیداره‌یێن سەربەخۆ، نھا ژی لژنەیەکا تایبەت دەست ب کۆمکرنا ھەموو زانیاری و داتایێن وان ده‌ڤه‌ردارییان کریه. ب گۆتنا ده‌ڤه‌ردارێ سۆران کارێ وێ لژنێ ب دوماھیک ھاتییە و ره‌وانه‌ى وەزارەتا ناڤخۆ یا ھەرێما کوردستانێ كریه، ل بەندا بجهئینانا وێ بریارێ نە.
ھەلگۆرد نەجیب گۆت ژی: سۆران ئێک ژ ده‌ڤه‌رداریێن مەزنە ل سنۆرێ پارێزگەھا ھەولێری ل سالا ١٩٨٠ بوویە ده‌ڤه‌ردارى، ژ چوار ناوچه‌دارى و نێزیکی ٢٥٠ گۆندان پێك دهێت.
هه‌روه‌سا ده‌ڤه‌ردارییا زاخۆ ژی سەر ب پارێزگەھا دھۆکێ یە و دکەڤیتە باکۆرێ پارێزگەھێ، ١٠ کیلۆمەتران ل تورکییا و ٢٥ کیلۆمەتران ل سۆریێ دوورە، ھەروەسا ژبلی نەتەوا کورد گەلەک ئایین و نەتەوەیێن دن ژی لێ دژین.
