پۆلیسێن ئەنقەرە ٢٧ لایەنگرێن داعشێ دەستەسەرکرن کۆ ب نیازبوون خۆەنیشاندانان بکەن.
رێڤەبەرییا گشتی یا پۆلیسێن ئەنقەرە د راگەھاندنەکێ دا راگەھاند؛ ھێزێن وان ٢٧ لایەنگرێن داعشێ دەستەسەرکرن کۆ ب نیازبوون بۆ ئازادکرنا بەرپرسێن خۆ یێن بلند ل باژێرێ ئەنقەرە خۆ‌نیشاندانێن بێ مۆلەت ئەنجام بدەن.
ل گۆرەی راگەھاندنا رێڤەبەرییا گشتی یا پۆلیسێن ئەنقەرە، ل رۆژا سێ شەمبی ل چار ریانا مستەفا کەمال، گرۆپەکی درۆشمێ ئازادی بۆ ماموستا خالس بایۆنجۆک بلندکربوو و دڤیا خۆ‌نیشاندانان بکەن بۆ ئازادکرنا خالس بایۆنجۆک کو بەرپرسەکێ بلند یێ داعشێ یە و ب ئەبو خەنزالە دھێتە نیاسین.
دیار ژی کرییە، سەرەرای وێ چەندێ چەند جارەکان وان ھۆشداری داینە وی گرۆپی لێ ئەو د رژدبوون ل سەر ئەنجامدانا چالاکییێن خۆ، و ب ئەگەرێ پێشێلکرنا یاسایا ژمارە ٢٩١١ یا تایبەت ب خۆ‌نیشاندانان ئەو گرۆپە ھاتنە دەستەسەرکرن و ڤەکۆلین دگەل وان دەستپێکرییە.
