به‌یار باڤی، رێڤه‌به‌رێ گهشهپێدانا جڤاكی ل زاخۆ بۆ خانی نیوز گۆت: ئه‌و سه‌ر ب رێڤه‌به‌رییا گهشهپێدانا جڤاكی ل دهۆكێ نه كو رۆله‌كێ باش د ره‌وشا كۆرۆنایێ دا گێڕان ژ به‌ر كو ره‌وشا دارایی یا وه‌لاتییان تێكچۆ، ل ده‌ستپێكا سه‌رهلدانا كۆرۆنایێ ل مه‌ها 4 ل هه‌ر قه‌زایه‌كا سه‌ر ب رێڤه‌به‌ریا وان ڤه لژنه‌ك هات پێكئینان و كه‌فتن كاری كو چاڤدێریا جڤاكی سه‌رپه‌رشت بوو و ب هه‌ڤكاریا ریڤه‌به‌رییا شه‌هید و ئه‌نفالكرییان، نوونه‌رێ هه‌رێمدارییا زاخۆ و سه‌ندیكا كریكاران پێكڤه ده‌ست بكاربوون، ل وی ده‌می هاریكاری ژ ئالیێ خێرخواز و كۆمپانییان ڤه دهاتن كرن كو پێك دهاتن ژ زه‌یت، ئار، برنج، نۆك، نیسك و ئاڤكا باجانسۆركان و هشكاتی ب سه‌ر هنده‌ك تاخێن دیاركری دا ژ سنورێ باتیفا تا بیشخابووری ڤه دهاتن به‌لاڤكرن و نزیكی 2000 خێزانان مفا ژێ وه‌رگرتن.
رێڤه‌به‌رێ گهشهپێدانا جڤاكی گۆت ژی: قوناغا دویێ ژی ل مه‌ها 6 ژ ئالیێ وه‌زاره‌تا كاروبارێن جڤاكی ده‌ستپێكر و هاریكاری و ئازۆقه ب سه‌ر 11 هزار و 800 خێزانان دا هاتن به‌لاڤكرن، قوناغا 3 یا هاریكارییان ژی ل مه‌ها 9 ده‌ستپێكر كو پتر ژ 14 هزار خێزان مفاداربوون و كوژمه‌كێ پاره‌ی بۆ هنده‌كێن دی ژی هات دابینكرن و هه‌روه‌سا نها ژی نزیكی 5 هزار خێزان مفاداربووینه كو كه‌ل و په‌لێن خوارنێ ب سه‌ر وان دا هاتینه به‌لاڤه‌كرن.
به‌یار باڤی خویا ژی كر، د ره‌وشا كۆرۆنایێ دا چه‌ندین خۆلێن هشیاركرنا جڤاكی بۆ كچ و كورێن سنێله ژ ئالیێ سه‌نته‌رێ خێزانی و پاراستنا زارۆكان ڤه هاتن پێشكیشكرن د گه‌ل رێنمایێن خوه‌پارێزیێ و تا نها ژی هه‌ر خێزانه‌كا پێدڤی بیت دخزمه‌تدانه بۆ هاریكاریێ.
دیار ژی كر، رێڤه‌به‌رییا گهشهپێدانا جڤاكی ل زاخۆ بزاڤان دكه‌ت پارچه زه‌ڤییه‌كێ ته‌رخان بكه‌ت ژ بۆ ئاڤاكرنا سه‌نته‌رێن ئۆتیزم، بێ سه‌میان و دانعه‌مران و داینگه‌هێن حكومی.
