پرۆسا دادگه‌هكرنا هه‌ڤسه‌رۆكێ پێشتر یێ پارتیا دیمۆكراتیك یا گه‌لان هه‌ده‌پێ بۆ 26ى مه‌ها گولانێ هات پاشخستن.
دادگه‌هكرنا سه‌لاحه‌دین ده‌میرتاش، هه‌ڤسه‌رۆكێ پێشتر یێ هه‌ده‌پێ ب تۆمه‌تا سڤكاتیكرنێ ب ئه‌حمه‌د داوود ئۆغلۆ، سه‌رۆكوه‌زیرێن پێشتر یێ توركیا دوهى رۆژا چارشه‌مبى ل دادگه‌ها چاغلایان ل سته‌نبۆلێ ده‌ستپێكر، لێ دادگه‌هێ چ بریار نه‌دان و روونشتنا دادگه‌هێ بۆ 26ى گولانا بهێت هاته پاشخستن.
د روونشتنێ دا پارێزه‌رێن ده‌میرتاشى و هژماره‌كا به‌رپرس و په‌رله‌مانتارێن هه‌ده‌پێ ئاماده‌بوون و ده‌میرتاشى ل زیندانا ئه‌درنه گۆتنێن خۆه ب رێیا سیسته‌مێ ده‌نگ و ره‌نگ پێشكێشكرن.
دەمیرتاش گۆت، ب ئه‌گه‌رێ پیشكێشكرنا دو گۆتاران ل ئامه‌دێ ئه‌و دێ ل سته‌نبۆلێ هێته دادگه‌هكرن، و ژ هه‌یڤا ئادارا بوورى تا نها ب به‌هانه‌یا كۆرۆنایێ رێ ب وى ناهێته‌دان چاڤپێكه‌تنا راسته‌وخۆ دگه‌ل پارێزه‌رێن خۆه بكه‌ت، ئه‌ڤه ژى بنپێكرنا مافێن وى یێن به‌رگریكرنێ یه.
سه‌لاحه‌دین ده‌میرتاش، هه‌ڤسه‌رۆكێ پیشتر یێ هه‌ده‌پێ د چارچووڤێ ڤه‌كۆلینێن تیرۆرێ دا ل سالا 2016ێ هاته ده‌سته‌سه‌ركرن و زێده‌ترى چار سالانه د زیندانا ئه‌درنه ڤه‌یه.
تا نها چه‌ندین جاران داخوازا ئازادكرنا ده‌میرتاشى هاتییه‌كرن و پێدڤى بوو دادگه‌ها ده‌ستوورى یا توركیا ل گۆره‌ى بریارێن دادگه‌ها مافێن مرۆڤى یا ئه‌ورۆپا ئه‌و ئازادكربا، لێ سه‌ره‌راى وێ بریارێ و كێشه‌یێن ساخله‌مییێ و به‌رده‌وامییا په‌تایا كۆرۆنایێ ده‌میرتاش هه‌ر د زیندانێ ڤه‌یه.
