یانا دالکورد یا کوردێن سوێدێ پشتی ل رۆژا پێنچشەمبیا بووری ب فەرمی ناڤ و لۆگۆیێ یانێ ب رازیبوونا دەستەیا گشتی یا یانێ گوھۆری، ئەو بریار بوو جھێ دلگرانیا جەماوەرێ یانێ ل ھەموو جیھانێ و وەکو رێزگرتن بۆ جەماوەر و حەزژێکەرێن وێ یانێ، کارگێریا یانێ بەیانامەکا فەرمی ل سەر مالپەرێ خوە بەلاڤەکر و تێدا دیارکر، ئەو ژی وێ دخوازن یا جەماوەرێ یانێ پێخوش بیت، لێ ئەو بریارا وان دەرێخستی بەری نوکە ژبەر بەرژوەندیا یانێ بوو کو ئەو بشێن رەوشا دارایی یا یانێ ب ھێز بکەن ب ناڤ و لۆگۆیێ یانێ یێ نوو، دبیت وان پتر سپۆنسەر ل خوە زێدەکربان ل سەر ئاستێ وەلاتێن ئەورۆپی و دەرڤەی ئەورۆپا، بەری نھا وان بتنێ ١٥٠ ئەندامێن پشتەڤانان ھەبوون پشتەڤانیا دارایی ل یانێ دکر، لێ ل دەمێ بھێت پتر پێدڤی ب ئەندامێن پشتەڤانێن یانێ بن و وان بریار دایە ژ ١٥٠ کەسان زێدە بکەن بۆ ٦٠٠٠ کەسان وەکو پشتەڤانیا دارایی یا یانێ بکەن و ل پاشەرۆژی ببنە پالدەرەکێ ب ھێز بۆ یانێ و مافێ دەنگدانێ د چەند بریارێن گشتی یێن سەر ب یانێ ڤە ھەبن.
یانا دالکورد دیار ژی کریە، پشتی ئەندامبوونێن جەماوەری تەمام ببن بریارە ل ٢٣ ڤێ ھەیڤی دەنگدان ل سەر ناڤ و لۆگۆیێ یانێ بھێتەکرن و ئەو جەماوەرێ ئەندامبوونا خوە تۆماربکەت دێ مافێ دەنگدانێ ھەبیت ل سەر وێ بریارێ، ھەر د گەل وێ بەیاننامێ ھەژمارەکا مەزن یا جەماوەرێ وێ یانێ ل وەلاتێ سوێدێ ئەندامبوونا خوە تۆمارکر.
سەرکەوت عەبدوللا جونەید، سەرۆکێ یانێ ل گەل سپۆنسەرێ یانێ کو کومپانیەکا سوێدی یە ٢٠٠٠ دەنگ کرین کو ھەر ئێک ژ وان کۆژمێ ١٠٠٠ ئەندامان پێشکێشکر وەکو پشتەڤانی، ئەندامێ دەستەیا گشتی یا یانێ ژی ئالان دوگان ٢٥٠ ئەندام کرین و ٣٧٥٠ دەنگێن دی کارگێریا یانێ دێ چاڤەرێ جەماوەرێ یانێ بیت ھەتا ٢٣ ڤێ ھەیڤی، ھەکە رێژەیا مەزن یا دەنگدانێ ھاتەدان بۆ مانا ناڤ و لۆگۆیێ یانێ وەکو خوە بەری نوکە دالکورد دێ مینیت.
خانی نیوز، ھەژار مەعروف:
