ھونەرمەندێ ناڤدارێ دەڤەرا بەھدینان، عەمەر گوندی ل دۆر داوی کارێن خوەیێن ھونەری بۆ خانی نیوز گۆت: داوی بەرھەمێ وی یێ سترانان بناڤێ (ئاڤان) بوو ژ (١٢) تراکان پێکدھات و ژ ھەلبەستێن(ھشیار رێکانی، محسن قوچان) و ھەژمارەکا ھەلەبەستڤانێن دی ژی پشکداری تێداکربوون ل گەل چەند سترانێن فلکلوری، ژبەرکو دروستکرنا ئەلبۆمێ کارەکێ بزحمەتە ب تنێ ئەو ستران ل کەنالێ خوەیێ تایبەتێ یوتوبی بەلاڤەکرن.
گوندی بەحسێ سترانا شاھینۆ کر و گۆت: سترانا شاھینۆ بابێ وی محەمەدێ باشۆی گۆت بوو و وی بیرھاتن د گەل ھەبووینە و بیرھاتنەک بوو ل گەل مامێ وی یێ ھونەرمەند (ئیسفێ عەبو خورتا) گەلەک جاران دھاتە مالا وان و وان ژی سەرەدانا وی دکر و گەلەک مفا ژێ وەرگرتیە، ئەو ستران یا دەڤەرا دھۆکێ و بەھدینانە و حەزدکەت ب جلکێن کوردی وێ سترانێ نیشا گەنجێن نوکە بدەت.
ل دۆر لبەرکرنا جلکێن کوردی ژی، عەمەر گۆندی گۆت: ژ زارۆکینی وی حەز ل سەر جلکێن کوردی ھەبوویە و تایبەت شەل و شەپکان و گرێدانا دەرسوکێ و گەلەکێ پێ داخباربوو و ھەمی کەسوکارێن لبەرخوە دکرن و حەزکەت ئەو جلک بمینن، ژبەرکو نیشانا مللەتێ کوردە و تایبەمەندیا دھۆکێ دیار دکەت، لەوما حەز ژێ دکەت، سازێ ژی ھەمی کورد حەز ژێ دکەن و دەمێ دژەنیت بزاڤان دکەت دەنگێ کوردی ژ سازێ دەرکەڤیت.
ھونەرمەند عەمەر گوندی گۆت ژی: ھەکە سترانەکێ خواست دوقولی بێژیت یێ بەرھەڤە بێژیت، ل سالا ١٩٩٩ وی ل گەل سترانبێژ (فاتێ) چەند سترانێن دوقولی گۆتینە و ئەلبۆما وی یا داویێ ژی د گەل سترانبێژەکا کوردا باکور بناڤێ (فەیرۆز شاە) سترانا دوقولی گۆتیە کو خەلکا ئامەدێ یە، سترانا (دینێ و دینو) پێکڤە گۆت و ھەر دەمێ فەر بیت مرۆڤ وێ گاڤێ دوقولی دبێژیت.
خانی نیوز، سالار محەمەد دۆسکی:
