ھەڤپەیمانییا فەتح یاکو ھادی عامری سەرۆکاتییا وێ دکەت راگەھاندییە، دێ ب مەرج دەنگی ل سەر پرۆژە قانوونا بودجێ سالا ٢٠٢١ دەت.
ھەڤپەیمانییا فەتح ب رێیا نڤیسارەکێ، پێنج خال وەکو مەرج دیارکرینە و داخواز دکەت د ناڤا پرۆژە قانوونا بوجەی دا جێگیر بکەن، ھەکە ئەو دەنگی ل سەر نادەن.
د وێ نڤیسارێدا ھاتییە، ئەندامێن ھەڤپەیمانییا فەتح ل جڤاتا نوونەرێن ئیراقێ دەنگ ب پرۆژە قانوونا بودجێ ٢٠٢١ نادەن، ھەکە ئەو خالە تێدا نەبن.
ئەو خال ژی ئەڤەنە:
– بھایێ ئالوگۆرا دراڤی د بودجەی دا (١١١٩) دینار بەرامبەر دۆلارەکێ بیت.
– وەزارەتا دارایی پلێن وەزیفی د کۆمسیۆنا ھەلبژارتنان دا نوو بکەت و کارمەندان ب گرێبەست دامەزرینیت.
– وەزارەتا دارایی لیستا وانەبێژێن خۆبەخش نوو بکەت.
– شایستێن وانەبێژێن خۆبەخش د بودجەی دا جێگیر بکەت.
-پشکا ھەرێما کوردستانێ ژ سەرجەمێ خەرجییا راستەقینە و نوکە و پرۆژێن وەبەرھێنانێ بھێتە دیار کرن، ئەو ژی پشتی دەرکرنا خەرجیێن سەروەری د پرۆژە قانوونا بودجێ سالا ٢٠٢١ ھاتییە دیار کرن، ب مەرجەکی ھەرێما کوردستانێ پابەند بیت ب پێدانا وێ برا نەفتێ یاکو ژ لایێ کۆمپانیا سۆمۆ ڤە ھاتییە دیارکرن، ئەگەر ھەرێما کوردستانێ پابەند نەبیت، چ خەرجی پێ ناھێنە دان و ھەر لایەکێ وێ برگی پێشێل بکەت دێ بەرپرسیارەتییا قانوونی کەڤیتە ستوویێ وی.
