وه‌زاره‌تا ساخله‌میا هه‌رێما كوردستانێ راگه‌هاند: هه‌ر ژ ده‌ستپێكا ده‌ركه‌فتنا ڤایروسێ كۆرونایێ كۆفید 19 ل جیهانێ، ب هه‌ستكرن ب به‌رپرسیاره‌تیێ وه‌زاره‌تا ساخله‌میێ دگه‌ل شیره‌تكار و بسپور و لایه‌نێن په‌یوه‌ندیدار و ئب پشته‌ڤانییا حكومه‌تا هه‌رێما كوردستانێ ل 23ێ هه‌یڤا ئێك یا سالا بوورى و ب هه‌ستیارى سه‌ره‌ده‌رى دگه‌ل ره‌وشێ كرییه، به‌رده‌وام بزاڤ ژى كرینه ده‌ستپێشخه‌رى هه‌بیت بۆ بابه‌تێ رێنمایان و رێكێن خوه‌پاراستنێ ژ به‌ر ساخله‌می و گیانێ وه‌لاتیان، به‌لێ ب مخابنى ڤه هه‌سته‌ك ل ده‌ڤ هنده‌ك كه‌سان په‌یدابوویه كو نه‌خۆشیا كۆرونایێ نه‌مایه و بێى هه‌بوونا چ به‌لگێن زانستى وان باوه‌رى ب هه‌بوونا ڤایرۆسى نه‌بوو و هه‌ست و سۆزا خه‌لكى ژى رادكێشا و هنده‌ك بابه‌تێن دى ژى ب پرسا كۆرونایێ ڤه گرێددان و دژى وان رێكاران بوون یێن حكوومه‌تا هه‌رێما كوردستانێ دانایین بۆ په‌رژه‌وه‌ندی و پاراستنا گیانێ وه‌لاتیان.
وه‌زاره‌تا ساخله‌میا هه‌رێمێ گۆت ژى: نها ژى كو ژیان یا ئاسایى بووى و هه‌موو جهـ هاتینه ڤه‌كرن، به‌لێ ب مخابنى ڤه رێنمایێن ساخله‌میێ ل پتریا جهان ناهێنه ب جهئینان ب تایبه‌ت ب كارئینانا ماسكان و خوه ژێك دووركرنێ، ژبه‌ر هندێ وه‌زاره‌تا ساخله‌میێ هۆشداریێ دده‌ت ل سه‌ر به‌لاڤبوونا ڤایرۆسێ كۆرونایێ كو ب شێوه‌یه‌كێ بله‌زتر و ب ترستر و ب تایبه‌ت پشتى به‌لاڤبوونا ڤایرۆسێ نوو یێ كۆرونایێ كو نوكه ل گه‌له‌ك وه‌لاتێن جیهانێ به‌لاڤبوویه.
وه‌زاره‌تا ساخله‌میا هه‌رێمێ داخواز ژ وه‌لاتیان كر پێگیریێ ب رێنمایێن ساخله‌میێ بكه‌ن، سوپاسیا پزیشك و كارمه‌ند و فه‌رمانبه‌رێن ساخله‌میێ كر كو ل هێلا پێشیێ دهێن بۆ رووبرووبوونا ڤایرۆسێ كۆرونایێ، هه‌روه‌سا رۆلێ هێزێن ناڤخوه و ده‌زگه‌هێن راگه‌هاندنێ و مامۆستاێن ئاینى و رێكخستنێن كۆمه‌لگه‌ها مه‌ده‌نى بلند نرخاند ژبۆ هشیاركرن و بجهئینانا رێكارێن خوه‌پاراستنێ دژى ڤایرۆسێ كۆرونایێ.
