سه‌رۆكێ هه‌رێما كوردستانی نێچیرڤان بارزانى، جه‌خت ل هندێ كر، كو پێدڤییه هەموو پێکهاتێن ئیراقێ ژ مافێن خوه، د نوكه و داهاتى دا دلنیا بن و هه‌ڤبەشى دەستهه‌لاتێ و برێڤه‌برنا وه‌لات بن، بۆ سەقامگیریىا ئیراقێ ژى دڤێت کێشێن سیاسی بهێنه چارەسەر كرن و هەموو پێکڤە ژ پێخه‌مه‌ت بەرژەوەندیىا وه‌لاتى و پێشخستنا وى دا کار بکەن.
ل گۆرێ راگه‌هاندنه‌كا سەرۆکایه‌تییا هه‌رێمێ، ئەڤرۆ ئێکشەمبى، 14-2-2021 نێچیرڤان بارزانى، سەرۆکێ هەرێما کوردستانێ پێشوازى ل بەڕێز د. سەعد حەمید کەمبەش، سەرۆکێ دیوانا وەقفى سوننى و شانده‌كێ ل گه‌ل دا كر.
د وێ دیدارێ دا ره‌وشا سیاسییا ئیراقێ و مەترسیێن تیرۆرێ و هەلبژارتنێن داهاتى هاتنه گوتۆبێژ کرن و هەردو ئالییان جەخت ل سه‌ر هندێ كر، پێدڤییه ئیراق ب تەڤایى و پێکڤە ژیانێ و لێبورینێ و سەقامگیرىێ و ئارامییا هه‌ڤبەش یا هەموو پێکهاتان ل پێگەهێن دەستهه‌لاتێ و رێڤه‌برنا وه‌لاتی كاربكه‌ن، هه‌روه‌سا دڤێت پێکهاته‌یێن ئیراقى پێکڤە کار بکەن و ل دووڤ دستوورى کێشێن وه‌لاتى بهێنه چارەسەر كرن و مافێن هه‌موو پێکهاتان بهێنه دەستەبەر كرن.
هه‌ر ل گۆرى وێ راگه‌هاندنێ، د كۆمبوونێ دا سەرۆکێ دیوانا وەقفا سووننى و شاندێ ل گه‌ل دا، پوختەك دەربارەى پێکهات و کار و چالاکییان خستنه به‌رچاڤ و جەخت ل ئاشتیخوازیێ و نەرمییا گوتارا وێ وەقفێ کر، كو پتر ژ سێزدە هزار مینبەرێن مزگەفتێ و سەدان قوتابخانە و ئامادەیى و پەیمانگەهـ و کۆلیژ ل هەموو ده‌ڤه‌رێن ئیراقی دهێنه ئاراسته كرن و خۆشحالییا خوه بۆ کارکرن و هەماهەنگیێ ل گەل لایەنێن پەیوەندار یێن هەرێما کوردستانێ دەربرى.
هه‌روه‌سا وێ راگه‌هاندنێ ئاماژه‌كریه كو وى شاندى سوپاسى و پێزانینێن خوه بۆ سەرۆک نێچیرڤان بارزانى و هەرێما کوردستانێ دووپات کرن، کو وان پێشوازی ل ئاواره‌یێن ده‌ڤه‌رێن سووننی یێن ئیراقى کرینە و هەموو هاریکاری پێشکێش کرینه، ده‌مێ ل دەستێ تیرۆرێن داعشێ، هه‌وارا خۆ بۆ هەرێما کوردستانێ ئیناى و بێ کێشە و ب ئارامى ماینه ل هه‌رێمێ و هاتینه پاراستن و ب رێز ڤه سه‌ره‌ده‌رى ل گەل وان هاتییه كرن.
هەر ئێك ژ د. محەمەد نوورى ئەلحاتەمى، رێڤه‌بەرێ گشتی یێ فەرمانگەها کارگێرى و د. مشعان خەلیل ئەلخەزرەجى، ڕاگرێ کۆلیژا ئەلئیمام ئەلئەعزەم و نورەدین محه‌مه‌د حه‌مید رێڤەبەرێ گشتی یێ رێورەسمان و هەماهەنگییێ یێ دیوانا وەقفا سوننى، ئەندامێن وى شاندى بوون.
