سنه‌: مامۆستایه‌كا كورد پێنج سالان هاته‌ زیندان كرن

ل دووڤ نووچه‌كێ رێکخراوا (هەنگاو) بۆ مافێن مرۆڤى، دادگه‌ها پێداچوونێ ل پارێزگه‌ها سنە سزایێ ١٠ سالان زیندانكرن بۆ زارا محەمەدی، مامۆستایا زمانێ کوردی و بەرپرسا جڤاتا کەلتۆری و جڤاكى یا نۆژین سه‌پاند بوو، لێ نوكه‌ ئه‌و سزایه‌ بۆ پێنج سالان كێم كرییه‌.

ئەو مامۆستایا زمانێ کوردی ل هاڤینا بورى لقێ ئێكێ یێ دادگه‌ها شۆره‌شێ ل سنە ب سەرۆکاتییا دادوەر سەعیدی ب تۆمەتا پێکئینانا گرۆپ ل دژی ئاسایشا نەتەوەییا ئیرانێ، سزایێ ١٠ سالێن زیندانكرنێ ب سەردا سەپاندبوو، دەرکرنا سزایێ ١٠ سالێن زیندانكرنێ ب تۆمەتا پێکئینانا گرۆپى د ده‌مه‌كێ دایه‌، كو زارا محەمەدی ب تنێ ئەنداما جڤاتا نۆژین بوویە و دادگه‌هێ ژى ئه‌و جڤات د هەموو تۆمەتان دا بێ تاوان ناساند بوو.

زارا د ژیێ ٢٨ سالیێ دایه‌ و ژ دایکبوویا گوندێ “سەراولە” یه‌، ل باژێرێ دێولان یێ سەر ب پارێزگه‌ها سنە ڤه‌یە و خودانا باوه‌رناما ماستەرێ یە د وارێ جیۆپۆلۆتیک ل زانکۆیا بیرجەند.