ب خه‌مه‌كا مه‌زن ڤه ئه‌ڤرۆ رۆژا دوشه‌مبیێ سپێدێ پێشمه‌رگه‌هێ ماندینه‌ناس، تێكۆشه‌ر و خه‌باتگه‌رێ نشتیمانپه‌روه‌رێ گه‌لێ كورد و ئه‌ندامێ مه‌كته‌با سیاسی یا پارتی دیموكراتی كوردستان، دكتۆر رۆژ نووری شاوه‌یس ژ ئه‌گه‌رێ نه‌خۆشییه‌كا گران ل باژارێ هه‌ولێرێ وه‌غه‌را داویێ كر، دكتۆر رۆژ ئه‌و شۆره‌شگێر و پێشمه‌رگێ مه‌زن بوو كو د قوناغێن جودا یێن خه‌باتا گه‌لێ خوه و پارتی دیموكراتی كوردستانێ دا، چ ل سه‌ر ده‌مێ چیایان و چ ل قوناغێن سه‌روه‌ری، یاسا، ب رێڤه‌برن و ئاڤه‌دانكرنا كوردستانێ و قوناغا ده‌ستووری و ئاڤاكرنا ئیراقا نوو، هه‌روه‌سا كارێن سیاسی، دبلۆماسی و شه‌ڕێ ل دژی تیرۆرێ دا به‌رخودانه‌كێ بها گران و ئارمانجێن گه‌لێ كورد بوو، هه‌موو ئه‌ركێن خوه ب دلسۆزی و پێشمه‌رگایه‌تی ب رێڤه‌دبرن.
مه‌سعود بارزانی د ته‌مامییا گوتارا خوه دا دبێژیت: دكتۆر رۆژی ژیێ خوه ژ بۆ دۆزا ره‌وا یا گه‌لێ كوردستانێ و بجهئینانا ئارمانجێن بلند و به‌رگریكرن ژ ئاخ و گه‌لێ كورد ته‌رخان كربوو، هه‌روه‌سا پێشمه‌رگه‌یه‌كێ وێره‌ك و وه‌فا یێ رێبازا بارزانی و كوردایه‌تیێ بوو، كۆچا داوی یا دكتۆر رۆژی بۆ هه‌موویان كۆڤانه‌كا مه‌زنه و ژ ده‌ستدانا وی بۆ خه‌لكێ كوردستانێ و بتایبه‌تی پارتی خوساره‌ته‌كا مه‌زنه، كوردستانێ سه‌ركرده و زه‌لامه‌كێ شۆره‌شگێرێ مه‌زن ژ ده‌ستدا، وی ژی برا و هه‌ڤالێ ژیێ خوه، دۆسته‌كێ نزیك و هه‌ڤسه‌نگه‌ره‌كێ خۆشتڤی ژ ده‌ستدا.
سه‌رۆك مه‌سعود بارزانی، سه‌ره‌خۆشی ل خێزانا نشتیمانپه‌روه‌ر یا دكتۆر رۆژ، سه‌ركردایه‌تی و ئه‌ندام و لایه‌نگرێن پارتی و هه‌ڤال و هه‌ڤڕێ یێن دكتۆر رۆژی و باژارێ هه‌لمه‌ت و قوربانی و هه‌موو خه‌لكێ كوردستانێ و ئازادیخوازێن ئیراق و جیهانێ كر.
سه‌رۆك بارزانی، ل داویا گوتارا خوه ژی داخواز ژ خودایێ مه‌زن دكه‌ت گیانێ خودێ لێخۆشبوو دكتۆر رۆژ ب به‌هشتا به‌رین شاد بكه‌ت و سه‌بر و ئارامیێ بده‌ته هه‌موو ئالییه‌كی.
