نێچیرڤان بارزانى: د. رۆژ دانوستاندکارەکێ زۆرێ سەرکەفتی بوو

نێچیرڤان بارزانى سه‌رۆكێ هه‌رێما كوردستانێ په‌یامه‌كا هه‌ڤخه‌میێ به‌لاڤكرو راگه‌هاند: نووچەیێ وەغەرکرنا پێشمەرگەیێ فەرماندە و سیاسەتمەدارێ ناڤدارێ کوردستانێ و ئەندامێ مەکتەبا سیاسی یا پارتی دیموکراتی کوردستان د. رۆژ نوری شاوەیس، گەلەک خەمناک و دلتەنگ کرین، ب ڤێ ھەلکەفتێ سەرەخۆشیێ ل ھەوەیێن بەرێز و ھەموو گەلێ کوردستانێ دکەم، ھەڤخەمێ ھەوە ھەموویانم.
 
سه‌رۆكێ هه‌رێما كوردستانێ گۆتییه‌ ژى: د. رۆژ وەک پێشمەرگە، فەرماندەییا چەندین داستان و سەرکەفتنێن مەزن یێن پێشمەرگەی کرییە، پێشمەرگەکێ ئازای بوویە، ھەموو ھەڤسەنگەرێن وی، شەھدەیێ بۆ ئازایەتی و پێشرەوی یێن وی ددەن، وەک سیاسەتکار کەسەکێ بھێنفرەھـ و دانوستاندکارەکێ زۆرێ سەرکەفتی بوو، ھەردەم بێی دەستھەلگرتن ژ مافێن گەلێ کوردستانێ، رێیەکا سازانێ و رێککەفتنێ ددیت، ژبەر لێزانی و سەرکەفتنێ دکاری دا، جھێ رێزەکا تایبەت یا جەماوەر و سەرکردایەتییا پارتی دیموکراتی کوردستان و ھەموو لایەنێن سیاسی یێن کوردستانێ بوو.
 
ناڤهاتى دیاركرییه‌ ژى، وەک سەرۆکێ حکومەتێ و سەرۆکێ پەرلەمانی ل کوردستانێ، رۆلەکێ بەرچاڤ د جێبەجێکرنا پڕۆژان و دەرکرنا یاسایێن زۆر باش بۆ خەلکێ ھەرێما کوردستانێ ھەبوون، ل سەر ئاستێ ئیراقێ وەک جێگرێ سەرۆک وەزیران رۆلەکێ بەرچاڤ د پاراستنا مافێن گەلێ کوردستانی دا ھەبوو، ل ھەموو قووناغ و پێگەھێن خوە دا ب ڕاستی و ب کریار، نیشتمانپەروەرییا خوە راستەقینە دیار دکر.
 

نێچیرڤان بارزانى سه‌رۆكێ هه‌رێمێ باس ل رۆلێ د. رۆژ نورى د كابینه‌یێن حكومه‌تێ دا كریه‌ و گۆتیبه‌: دەمێ د. رۆژ بوویە سەرۆکێ کابینا سییێ یا حکومەتی ھەرێما کوردستانێ، وى شانازیا ھندێ ھەبوو وەک جێگرێ بەرێزی ل حکومەتێ کار بکەت و ژ ئەزموون و شارەزاییا وی فێر ببیت، ھەروەک چاوا ئەو و نفشێ زێرین یێ سەرکردایەتیا پارتی، پشتی وەغەرکرنا بابێ وى، گەلەک فێر کر و گەلەک پشتەڤانێن وى بوون.
 
نێچیرڤان بارزانى ئه‌و یه‌ك ژى خویاكریه‌: د. ڕۆژ وەک ئێک ژ وی نفشێ زێڕین یێ پارتی کو جھێ ڕێزەکا زۆر تایبەتن، ل رۆژگارێن زۆر سەخت و تەنگ ‌دا ھەر زوو ئالایێ خەباتێ بلند کرییە و ب دلگەرمییەکا زێدەتر درێژی ب بزاڤا ڕزگاریخوازییا نیشتمانی یا کوردستانێ دایە.
هه‌روه‌سا گۆتییه‌: د. رۆژ نوری شاوەیس کو، ژ دایکوبابێن خوەڤە کورێ بنەمالەکا ناڤدار و رەوشەنبیر و شۆرەشگێرێن سلێمانیێ بوو، کەسەکێ زۆر ب شیان بوو، ھەموو شیان و گەنجاتیا خوە بەخشینە گەلی خوە، ژ دەستدانا وی، زیانەکا گەلەک مەزنە بۆ ھەموو گەلێ کوردستانێ، لەوما پرسەیا وی، پرسەیا ھەموو گەلێ کوردستانێ یە.
سه‌رۆكێ هه‌رێمێ ل دووماهیێ گۆتییه‌: د. ڕۆژ ب تێکۆشانا سەخت و دلسۆزانە بۆ نەتەوا خوە و ھەموو گەلێ کوردستانێ، ناڤێ خوە بۆ ھەردەم د مێژوویا کوردستانێدا نەخشاند. خودایێ مەزن گیانی وی شاد بکەت و دلرحەتییێ ب بنەمال و کەسوکار و ھەڤالێن وی و ھەموو گەلێ کوردستانێ ببەخشیت.