سه‌رۆك مه‌سعود بارزانى په‌یامه‌كا هه‌ڤخه‌میێ و سه‌ره‌خۆشیێ ئاراسته‌ى بنه‌مالا د. ئارام باله‌ته‌ی په‌یڤدارێ فراكسیۆنا پارتى ل په‌رله‌مانێ ئیراقێ كر و راگه‌هاند: دكتۆر ئارام گه‌نجه‌كێ خوه‌دان باوه‌ر و زیره‌كبوو.
سه‌رۆك بارزانى د په‌یاما خوه‌دا گۆتییه: وى ب خه‌مه‌كا مه‌زنڤه نووچه‌یێ وه‌غه‌را دووماهیێ یا دكتۆر ئارام باله‌ته‌ى ئه‌ندامێ جڤاتا نوونه‌رێن ئیراقێ و په‌یڤدارێ فراكسیۆنا پارتى ل جڤاتا نوونه‌رێن ئیراقێ بهیست، دكتۆر ئارام گه‌نجه‌كێ خوه‌دان باوه‌ر و زیره‌ك بوو، ژ مالباته‌كا نشتیمانپه‌روه‌ر بوو و وى ب دلسۆزێ ئه‌ركێن خوه بجهـ دئینا.
بارزانى گۆتییه ژى: ئه‌و سه‌ره‌خۆشیێ ئاراسته‌ى مالبات و كه‌س و كار و هه‌ڤالێن خوه‌دێ ژێ رازى ئارام باله‌ته‌ى و ئه‌ندامێن فراكسیۆنا پارتى دكه‌ت و خوه ب هه‌ڤپشكێ خه‌ما وان دزانیت.
ل دووماهییا په‌یاما خوه‌دا سه‌رۆك بارزانى هیڤییا وێ یه‌كێ خواستییه كو خوه‌دایێ مه‌زن گیانێ وى ب به‌هشتا به‌رین شاد بكه‌ت و سه‌بر و ئارامیێ بده‌ته هه‌موو لایه‌كى.
