نێچیرڤان بارزانى جێگرێ سه‌رۆكێ پارتى سالیادا 68ێ یا دامه‌زراندنا ئێكه‌تییا قوتابیێن كوردستانێ ل سكرتێر و ئه‌ندامێن سكرتارییه‌تێ و هه‌ڤالێن لژنا راپه‌راندنێ و هه‌موو ئه‌ندامێن ئێكه‌تییا قوتابییان و هه‌موو قوتابییان پیرۆزدكه‌ت و هیڤیا سه‌ركه‌فتنێ بۆ وان دخوازیت.
جێگرێ سه‌رۆكێ پارتى د په‌یاما خوه دا راگه‌هاندییه: ئێكه‌تییا قوتابیێن كوردستانێ خوه‌دان دیرۆكه‌كا پر سه‌روه‌رییه، سه‌ره‌راى به‌خشینا چه‌ندین شه‌هیدێن قه‌هره‌مان ب گه‌ل و نشتیمانى، ئه‌و لاندكا چه‌ندین سه‌ركرده و تێكۆشه‌رێن دیارێن گه‌لێ مه بووینه كو رۆله‌كێ گرنگ د بزاڤا رزگاریخازی دا دیتینه.
ناڤهاتى گۆتییه ژى: ئێكه‌تییا قوتابیێن كوردستانێ ئه‌ركێ گرنگێ نشتیمانى و پیشه‌یی ل سه‌ر ملێ وانه، ب تایبه‌ت ژى د پێگه‌هاندنا تاكێ هشیار و كه‌سایه‌تیێن پشت ب خوه به‌ستى و كادرێن دلسۆز و كارمه‌ندێن زیره‌ك.
نێچیرڤان بارزانى دووپاتكریه ژى: گرنگه پێنگاڤێ ئێكه‌تییا قوتابیێن كوردستانێ بله‌زتر و بهێزتر بن و مل ب ملێ پێشكه‌فتنا بله‌ز و مه‌زن یا سه‌رده‌مى د بیاڤێ زانست و خاندن و په‌روه‌ردێ دا، هه‌روه‌سا رۆلێ خوه د بهێزكرنا بنه‌مایێن لێبورینێ و گیانێ ئاشتیخوازیێ و مرۆڤدۆستی دا ببینن. هه‌روه‌سا هانده‌ربن بۆ ئێكرێزی و ته‌بایی د ناڤ هه‌موو ئالیێن سیاسى و پێكهاته‌یێن كوردستانێ دا.
