پێنتاگۆن ل دۆر ھێرشا ھەولێرێ: مافێ مەیە بەرگریێ ژ خوە بکەین

وەزارەتا بەرگرییا ئەمریکا پپێنتاگۆنێ راگەھاند، لێکۆلین ل دۆر ھێرشێن ل سەر ھەولێرێ دەستپێکرینە، ھێزێن وان یێن سەربازی ژی ماف ھەیە بەرگریێ ژ خوە بکەن.
جۆن کێربی، پەیڤدارێ پێنتاگۆنێ د پرێسکۆنفرانسەکی دا راگەھاند، لێکۆلین ل دۆر ھێرشا ل سەر ھەولێرێ دەستپێکرینە، ئەمریکا ژی بەرھەڤە رۆلێ ھاریکاریێ د وێ لێکۆلینێ دا بگێریت ھەکە داخواز ژێ بھێت کرن.
گۆت ژی: یا باش ئەوە چاڤەرێ ئەنجامێن لێکۆلینێ بن و نھا پرۆسا وەرگرتنا زانیارییان دەستپێکرییە.
پەیڤدارێ پێنتاگۆنێ دوپات کر، ھێز و فەرماندارێن وان مافێ بەرگریکرنێ ژ خوە ھەیە، ھەکە سوپایێ وان بەرسڤا وان ھێرشان بدەت وی دەمی دێ جھـ و دەمی دیار کەن، لێ بۆ وێ یەکێ دێ دانوستاندن د گەل ھەڤپشکێن وان یێن ئیراقی ھەبن.