ڤیان سه‌بری: شاندێ هه‌ولێرێ ب رێككه‌فتن دێ ژ به‌غدا ڤه‌گه‌ریت

سه‌رۆكا فراكسیۆنا پارتی ل جڤاتا نوونه‌رێن ئیراقێ راگه‌هاند؛ شاندێ هه‌رێمێ ل دۆر بوودجه‌ی ئه‌ڤرۆ ئێڤاری دێ سه‌ره‌دانا به‌غدا كه‌ت و ب رێككه‌فتن دێ ژ به‌غدا ڤه‌گه‌ریت.

ڤیان سه‌بری، بۆ خانی نیوز راگه‌هاند؛ ئه‌ڤرۆ ئێڤاری شاندێ دانوستاندكارێ هه‌رێمێ ل دۆر رێككه‌فتنا ل سه‌ر پرۆژه‌ بودجه‌یا سالا 2021 دێ سه‌ره‌دانا به‌غدا كه‌ت و چه‌ندین پێشنیار د ناڤبه‌را هه‌ردو ئالییان دا هه‌نه‌ كو فراكسیۆنێن كورد دوپاتیێ ل خالێن 10 و 11 دكه‌ن كا چه‌وا ژ حكومه‌تا فیدرال ده‌ركه‌تینه‌ ئه‌و وه‌سا پشتگیریێ دكه‌ن بێی گوهۆرین و پێشبینیێن باش هه‌نه‌ دێ ب ته‌مامی رێككه‌ڤن.

سه‌رۆكا فراكسیۆنا پارتی گۆت ژی، پێشنیاره‌كا دی هه‌یه‌ كو پێدڤییه‌ كورد مه‌له‌فێ داهاتێ په‌ترۆلێ ب ته‌مامی راده‌ستی حكومه‌تا ئیراقێ بكه‌ن و ئه‌و یه‌كه‌ ژی قابلی رازیكرنێ نینه‌.

ڤیان سه‌بری گۆت ژی، پێشنیاره‌كا دی ژ ئالیێ شیعه‌یان ڤه‌ هه‌یه‌، كو پێدڤییه‌ ئه‌و په‌ترۆل بچیته‌ كۆمپانییا سۆمۆ كو قه‌بارێ وێ 250 هزار به‌رمیلن په‌ترۆلێ نه‌ و حكومه‌تا فیدرال بهایێ وان بده‌ت، هه‌روه‌سا بهایێ 180 هزار به‌رمیلان بۆ مه‌زاختیێن به‌رهه‌مئینانێ و ڤه‌گوهاستنێ و بكارئینانا ناڤخۆ بهێن به‌رهه‌مئینان.

ئه‌حمه‌د سه‌فار، ئه‌ندامێ لژنا دارایی یا جڤاتا نوونه‌رێن ئیراقێ ژی دوهی بۆ خانی نیوز گۆتییه‌: بجهئینانا رێكکەفتێ دێ بیتە ئه‌گه‌ره‌ك کۆ ئێدێ مووچەیێ فەرمانبەرێن هەرێمێ بێی لێبرین بهێتە دابەشکرن و هندەک پارە بۆ وەبەرهێنانێ ژی دێ مینن.