خێزان د ڤی سەردەمی دا پێدڤی ب سیستەمەکێ نوویه بۆ ژیانێ، رەوشەنبیرەک ژی دبێژیت پێدڤییە دایک و باب رەوشەنبیرییا خوه یا کەسایەتی ئاڤابکەن. لەیلا وەحید دایکا دو زارۆیانە دیارکر، پەروەردەکرنا زارۆکان و پەیداکرنا رەوشەنبیریێ ل نك وان د ڤی دەمی دا کارەکێ ب ساناھی نینە، ژبه‌ركو د نھا دا پتر ئەندامێن خێزانێ ب تۆرێن جڤاکی ڤە د مژویلن و ھەتا دایک و باب ژی ب دروستی ب ئەرکێ خوه نارابن.
ڤیان محه‌مه‌د، نڤێسه‌ر و ره‌وشه‌نبیر دەربارەیی بابەتی گۆت: دایک و باب بەرپرسێن سەرەکی نە بۆ رەوشەنبیرییا خێزانێ، د ڤێ مژارێ دا دایک ب ھندەک رەھند و پرەنسیپان بەرپرسە بۆ پەروەردەکرنێ و باب ژی ب ھندەک رەھندان، ب بۆرينا چەرخی گەلەک گوھۆرین یێن ب سەر خێزانان دا ھاتین، لەورا خێزان بووینە دو پشك، گەلەک ژ وان پاشڤەمایی نە، هه‌ر چه‌نده رێژا رەوشەنبیران ژی ھەیە، لێ رێژا وان گەلەک یا کێمە.
ڤیان محه‌مه‌د گۆت ژى: دڤێت بزاڤ بۆ ئاڤاکرنا خێزانەکا رەوشەنبیر بھێنەکرن، ژبه‌ركو رەوشەنبیرییا خێزانێ رەوشەنبیرییا جڤاکی یە، پشكداریکرن د داھاتیێ خێزانێ دا و پەروەردەکرنا خێزانێ و دلینی و پێگری ب ئەرکێن خێزانێ و دەستنیشانکرنا ناسناما ئەندامێن خێزانێ ب شێوەکێ یاسایی و پەروەردەکرنا زارۆکان، بنەما نه و دبنە پیڤەر بۆ خێزانێ ناڤ جڤاکی دا.
ڤیان محه‌مه‌د گۆت ژى: داكو خێزان یا رەوشەنبیر بیت، دڤێت رەوشەنبیرییا خوه یا کەسایەتی ب خواندنا پەرتووکێن دکیۆمێنتان ئاڤابکەت داکو ئەو کەسێن ل بەردەستێ وان دھێنە پەروەردەکرن رەوشەنبیربن. ژلایێ خوه‌ڤه شێرزاد وەلید، شارەزایێ جڤاکی دیارکر: خێزان جھێ بەختەوەری و ئارامی و پەروەردەکرنا مرۆڤانە، ئەو ژینگەھە یا مروڤ تێدا دھێنە ئاڤاکرن، لەورا ژی گەلەک یا گرنگە خێزانەکا رەوشەنبیر بھێتە ئاڤاکرن، نه خێزانەکا دکتاتور بیت و توندوتیژیێ بکاربینیت، دڤێت خێزان یا دیموکراسی بیت، یاسا و بریارێن خوه ھەبن، نەک بەرەلایی ھەبیت دناڤ خێزانێ دا و ھەر تشت ل دووڤ حەزێن خوه بکەن کو بیتە ئەگەرێ ژ ناڤچوونا خێزانێ.
