سهرۆك مهسعود بارزانى، پێشوازیی ل جێگرێ وەزیرێ دەرڤه یی ئەرمینیا و شاندهكێ ل گهلدا كر، د وێ دیدارێ دا سەرۆك بارزانی ئاماژە ب پەیوەندییا دێرین یا گەلێ كوردستانێ و گەلێ ئەرمینیا دا.
ئهڤرۆ چارشهمبى، 24-2-2021 ل سەلاحەدین، سەرۆك بارزانی پێشوازی ل ئارتاك ئاپیتۆنیان، جێگرێ وەزیرێ دەرڤه یێ ئەرمینیا و شاندهكێ ل گهلدا كر، كو پێكهاتبوون ژ هارچیا پۆلادیان، بالیۆزێ ئەرمینیا ل ئیراقێ و ئارشاك مانۆكیان، كونسۆلێ ئەرمینیا ل هەولێرێ و چەندین دبلۆماتكارێن وەزارەتا دەرڤه یا ئەرمینیا.
د وێ كۆمبوونێ دا جێگرێ وەزیرێ دەرڤه یێ ئەرمینیا، پێزانین ل سهر خەبات و ماندیبوونا سەرۆك بارزانی هەبوون، كو وى ژیانا خوه بۆ ئازادی و مافێن نەتەوهیا خوه تەرخان كرینە، هەروەسا سوپاسییا سەرۆك بارزانی و دامودەزگەهێن هەرێما كوردستانێ و خەلكێ هەرێما كوردستانێ كر، د پاراستن و پێكڤەژیان و پاراستنا مافێن پێكهاتیێ ئەرمەنان ل هەرێما كوردستانێ، جەخت لسهر هندێ كر، وهلاتێ وى دڤێت پەیوەندیێن دبلۆماسی و بازرگانی ل گهل هەرێما كوردستانێ ب هێز و بهرفرههتر لێ بكهت.
هەر د وێ دیدارێ دا سەرۆك بارزانی ئاماژە ب پەیوەندیێن دێرینی یێن گەلێ كوردستانێ و گەلێ ئەرمینیا دا و دیار كر، كو پەخشێ ئێكێ یێ رادیۆیا كوردی ل یێریڤانا پایتەختێ ئەرمینیا بەلگەیە ل سەر وێ پەیوەندییا مێژوویی و فەرهەنگا دناڤبهرا هەردو گەلان دا، ههروهسا خۆشحالییا خوه دەربری كو پەیوەندیێن د ناڤبهرا هەرێما كوردستانێ و ئەرمینیا بهرفرههتر ببن، سهرۆك بارزانى گۆت ژى، كوردستان دێ وەك نموونا پێكڤەژیانا ئایینی و نەتەوەیی مینیت و دێ ب هەموو شیانان پشتهڤانییێ ل مافێن پێكهاتێن هەرێما كوردستانێ كهت.
