حکومەتێ پڕۆژەیاسایا وەزارەتا کارەبێ پەسەندکر

جڤاتا وه‌زیرێن هه‌رێما كوردستانێ گۆتوبێژ ده‌رباره‌یى داوى بریارێن ل سه‌ر پرۆژه‌ یاسایا بودجا فیدرال و بودجا هه‌رێما كوردستانێ كر، و هه‌ر د كومبوونێ دا په‌یره‌وا هه‌ڤپشكا دناڤبه‌را كه‌رتێ گشتى و كه‌رتێ تایبه‌ت ل هه‌رێما كوردستانێ و ره‌شنڤیسا پرۆژه ‌یاسایا وه‌زاره‌تا كاره‌بێ په‌سه‌ندكر.

رۆژا چوارشەمبى 24-02-2021 جڤاتا وەزیرێن هەرێما کوردستانێ ب سەرۆکایەتییا مەسرور بارزانی، سەرۆکوەزیرێن هەرێما کوردستانێ و ب ئامادەبوونا قوباد تاڵەبانی، جێگرێ سەرۆکوەزیران کۆمبوون. 

ل دووڤ راگه‌هاندنا کۆمبوونێ، قوباد تاڵەبانی، جێگرێ سەرۆکوەزیران و سە‌رۆكێ شاندا دانوستاندكارا هەرێما کوردستانێ ل گەڵ بەغدا، دوا پێشھات و رێكێن دانوستاندنان ل ‌گە‌ڵ حکومەتا فیدراڵ سە‌بارە‌ت ب پرسا بودجە‌ى و شایستە‌ێن دارایێن ھە‌رێما كوردستانێ د پڕۆژە‌ یاسایا بودجا 2021 دا، دیاركرن و راگەهاند: ئه‌م د به‌رده‌وامین ل سه‌ر دانوستاندنان و نوكه‌ ژى ئاماده‌ییه‌كا باشتر هه‌یه‌ بۆ چاره‌سه‌ركرنا ئه‌ڤى بابه‌تى.

ئاوات شێخ جەناب، وەزیرێ دارایی و ئابووری و د.دارا رەشید، وەزیرێ پلاندانانا هەرێما کوردستانێ د وێ كۆمبوونێ دا د پشكداربوون، هه‌ردوو لایان داوى تیشك ئێخستنه‌ سه‌ر ئاماده‌كاریێن پرۆژه‌ یاسایا بودجا هه‌رێما كوردستانێ بۆ سالا 2021ێ و ئاماژه‌ ب هندێ ژى كر كو زۆربه‌یا داتایا وه‌زاره‌تان هاتینه‌ ئاماده‌كرن  بۆ هندێ بودجه‌كا شه‌فاف و واقیعى بهێته‌ ئاماده‌كرن.

وەزیرێ پلاندانانا هەرێما کوردستانێ، رەشنڤیسێ پڕۆژەیێ هه‌ڤبه‌شكرى د ناڤبه‌را  کەرتێ گشتی و کەرتێ تایبەت ل هەرێما کوردستانێ دیاركرن. 

 ژبلى ڤان ته‌وه‌ران ژى كو به‌حس لێهاتینه‌ كرن ئه‌و ژى وه‌زاره‌تا كاره‌با هه‌رێما كوردستانێ كو ژ لایێ كه‌مال محه‌ممه‌د وه‌زیرێ كاره‌بێ ئه‌و ته‌وه‌ره‌ هاته‌ به‌حسكرن.

د.سامان بەرزنجی، وەزیرێ تەندروستیێ هەرێما کوردستانێ راپۆره‌ك سەبارەت ب ڤایرۆسێ کۆرۆنایا نوو و پلانا وەزارەتێ ده‌رباره‌یى رێکارێن تەندروستیى بۆ رووبەڕووبونا ڤایرۆسێ كۆرونایا نوو به‌رچاڤكرن. 

هەروەسا ئالان حەمە سەعید وەزیرێ پەروەردا هەرێما کوردستانێ ده‌ربارەی پرۆسەیا خاندنێ راگەهاند: دێ بەردەوام بن ل سه‌ر پرۆسەیا خاندنێ ب مه‌رجێ پێگیریكرن ب رێكارێن ته‌ندروستى و دگه‌ل پاراستنا  سه‌لامه‌تى و ژیانا قوتابیان و مامۆستایان و كارمه‌ندێن په‌روه‌ردێ و ناڤه‌ندێن خواندنێ.