پەرلەمانتارەکا کرستییان ل پەرلەمانێ کوردستانێ خویاکر، پرسا کریستیانا ل کوردستانێ و عیراقێ جوداھییەک مەزن ھەیە ژ ھەموو ئالیان ڤە، ھەتا نوکە ل کوردستانێ کریستییانەک نەبوویە قوربانی، لێ ل عیراقێ ترس ل سەر ژیانا وان ھەیە و ژ سالا ٢٠٠٣ ھەتا ٢٠١٤ ب سەدان کریستیان ھاتینە شەھیدکرن و ھەژمارەکا وان کەسایەتیێن ئایینی بوون و ژبلی وان کریستیانێن ژبەر ترسا تیرۆرێ پەنابەری وەلاتێن ئەورۆپی بوویین. رۆبینا تیاری، بۆ خانی نیوز گۆت: ل کوردستانێ پێکڤەژیانەکا باش ھەیە و ھەتا نوکە جوداھی نەھاتیە کرن ناڤبەرا چۆ پێکھاتەکێ کوردستانێ دا . کریستیانا بەردەوام گرنگییا کوردستانێ و ب دەستڤەیٔینانا دەسکەفتان و پاراستنا وان ب ئەرکێ خوە زانیە، ھە ر شاندەکێ کریستیانا بچیتە دەرڤە ی کوردستانێ یان شاندەکێ بیانی سەرەدانا کوردستانێ و کریستیانان بکەت، ھەرجار ب گرنگی ڤە بەحسێ دەسکەفت و دیرۆکا کوردستانێ کریە کو ئێکە ژ ئارامترین ھەرێم ل دەڤەرێ ھەموویێ و بەردەوام شانازی ب وێ پێکڤەژیانا ل کوردستانێ بریە. تیاری بەحس ل هێرشێن ل سەر کرستییانان کر و گۆت: داعش و حەشدا شەعبی و تیرۆرێ ب گشتی زیانێن مەزن گەھاندینە کریستیانان ل عیراقیێ و دەشتا نەینەوا و دخوازن بھێنە قەرە بووکرن ب قەرەبوویا ماددی و مەعنەوی بۆ دوبارە نەبوونا وان ئالۆزیان. رۆبینا تیاری، پەرلەمانتارا کرستییان ل پەرلەمانێ کوردستانێ ئاشکرا ژی کر، ئەو دخوازن کو ھێزێن چەکدارێن عیراقی دەڤەرێن وان چوولکەن و پیشمەرگە ب ڤەگەرنە سەر جھێن خوە ژبەرکو پاراستنا دەڤەرێن کریستیانان ب پێشمەرگەی ڤە گرێدایە. تیاری گۆت: ل کوردستانێ کریستیان ھە ردەم جھێ گرنگیێ بووینە و بەردەوام پشکداربووینە ل پەرلەمان و حکومەتا کوردستانێ و د کابینا نوی ژی دا بریارە چەند پۆستان وەرگرن و ل پەرلەمانێ کوردستانێ د چارچوڤێ قانونێ دا دێ داخوازا ھەموو مافێن کریستیانان کەن ل عیراقێ و کوردستانێ.
