ژبەر رێنمایێن ب زحمەتێن ئه‌ره‌بستانا سعوودیێ بۆ چوونا عومرێ، 15 رۆژ دەربازبوون ل سەر دەسپێکرنا گەشتێن عومرێ ل ھەرێما کوردستانێ و ھەتا نها چ گەشت نەھاتینە كرن. نەبەز ئسماعیل کەمال، پەیڤدارێ وەزارەتا ئەوقاف و کارۆبارێن ئایینی یا حکومەتا ھەرێما کوردستانێ بۆ خانی نیوز گۆت: کۆمپانیێن عومرێ ھاتینە ئاگەھدارکرن بۆ دەسپێکرنا گەشتێن عومرێ، لێ ھەتا نها چ گەشتێن عومرێ دەست پێنەکرینە، ئەڤە ژ بەر رێنمایێن توند یێن ھاتینە سەپاندن ل سەر خەلکی و خەلک نەشێت بچیتە عومرێ. پەیڤدارێ وه‌زاره‌تا ئەوقاف و کارۆبارێن ئایینى گۆت ژی: 15 رۆژە ب شێوەکێ فەرمی گەشتێن عومرێ ل کوردستانێ دەسپێکرینە، لێ ھەتا نها چ کۆمپانی نەھاتینە کو دیار بکەت کو خەلکەک بەرھەڤە بچیتە عومرێ و کار ئاسانی بۆ بھێنەکرن .
ناڤبری گۆت: 14 کۆمپانیێن سەرەکی ل گەل 85 کۆمپانیێن لاوه‌کی ل کوردستانێ ھەنە کو کارێ عەمرێ دکەن و ھەتا نها چ کۆمپانیان ھەژمارەکا دروست یا خەلکی بەرھەڤ نەکریە کو گەشت بۆ بھێنە بەرھەڤکرن، ل عیراقێ ب گشتی ھەتا نها دو گەشتێن عومرێ ل باشوور و ناڤەراستا عیراقێ چووینە ئه‌ره‌بستانا سعوودیێ.
نەبەز ئسماعیل کەمال، پەیڤدارێ وەزارەتا ئەوقاف و کارۆبارێن ئایینی گۆت: ژبه‌ر رێنمایان مەزاختیێن عومرێ زێدەتر بووینە و ھەکە کەسەک تووشی کۆرۆنایێ بیت بۆ ده‌مێ 14 رۆژان دێ ھێتە کەره‌نتیکرن و ھەموو مەزاختی ل سەر وی نە.
