شۆره‌شا مه‌زنا ئیلۆنێ ل رۆژهه‌لاتا ناڤین د 100 سالا ده‌رباز بووی دا، ئه‌و شۆره‌ش بوو یا ب ته‌ڤگه‌ره‌کا گه‌لێری، دهاته ناسکرن، ئانكو شۆره‌شێ گرنگی نه ب ته‌نێ ب لایه‌نێ له‌شکه‌ری یان نه‌ته‌وه‌یا کورد ددان.
به‌لکو لایه‌نێ له‌شکه‌ری،سیاسی دپلۆماسی، جڤاکی و ره‌وشه‌نبیری ب هه‌ڤرا ئیخستینه د وارێن خه‌باتێ دا. ژ هه‌موو لایه‌کی ڤه شۆره‌ش به‌رده‌وام بوو ژ بۆ مافێن نه‌ته‌وه‌یی و چاره‌سه‌ریا دۆزا ره‌وایا گه‌لێ کورد و گه‌لانێن د ناڤ ئاخا کوردستانێ دا مل ب ملێ گه‌لێ کورد دژیان. وه‌کو ئاشووری، ئه‌رمه‌نی، تورکمان و عه‌ره‌ب، چ ده‌مه‌کێ شۆره‌ش ژ پره‌نسیپێن خوه لانه‌دا یه ب تایبه‌ت چاره‌سه‌ریا پرسگرێکا کوردان دگه‌ل رژێمێن ده‌ستهه‌لاتدار ل به‌غدا، ئانکو نه‌هێلایه پێکدادانێن نه‌ته‌وه‌یی دورست ببن، هه‌ر ده‌م ب سایا شۆره‌شێ پێکڤه‌ژیان به‌رده‌وام بوو.
ئاها د ڤی ده‌می دا، هیزێن به‌رژه‌وند په‌رست و وه‌لاتێن مێتینگه‌ر، ده‌ستێن خوه یێن قرێژ گرتی، درێژی شۆره‌شا مه‌زنا ئیلۆنێ كر یا چریسکا ئاگرێ وێ ل 11-9-1961هه‌تا 6-3-1975-ێ) تیکۆشینا وێ یا به‌رده‌وام بوو. لێ ده‌ما ب په‌یمانا خیانه‌تکاریا ناڤده‌وله‌تیا جه‌زائیرێ، کو د هه‌مان ده‌م دا هێزێن ناڤخوه‌ی، هه‌رێمی و زلهێزێن جیهانی یێن وه‌کو ئه‌مریکا و بریتانیا و هتد… وه‌کو هه‌ر جار ده‌ستێن خوه یێن گه‌مارگرتی ته‌ڤلی ئێککرین ژبۆ ژناڤبرنا شۆره‌ش و ته‌ڤگه‌را ئازادیخوازیا کوردی یا کو ملله‌تێ کورد ل هه‌ر چار پارچێن کوردستانێ هیڤیێن خوه پێڤه گرێدا بوون! لێ مخابن د قادا ناڤنه‌ته‌وه‌ی دا ژ ئالیێن سیاسی، له‌شکه‌ری، دپلۆماسی و دارایی بێ پشت و په‌نا ماین.!
شۆره‌شگێر و پێشمه‌رگێن وه‌لاتی ژ نه‌چاری هنده‌کان خوه راده‌ستی دوژمنی کرین، لێ کۆمه‌کا جانگۆریان، هزر د تێکۆشینه‌کا چه‌کداری و شه‌رێن پارتیزانی دا کرن، ژ بۆ شۆره‌شه‌کا نوی به‌رهه‌ڤیێن شۆره‌شه‌کا نوی ب ئاوایه‌کێ رێکخستی هاتنه کرن و گه‌له‌ک تێکۆشه‌ر ب مالبات و زارۆکێن خوه ڤه رێکا شۆره‌شێ و ده‌ربه‌ده‌ری و شه‌رێن پارتیزانی و ئاسته‌نگیێن هه‌ری مه‌زن و کوردستان یان نه‌مان هه‌لبژارتن.
هه‌ر ل ده‌ستپێکا شۆره‌شا گولانێ یا پێشکه‌فتنخواز مالباتا مه رێزێن شۆره‌شێ و پارتی و رێبازا، بارزانیێ نه‌مر ل (26-5-1976-) هه‌لبژارتن، ل وێ قۆناغێ مه په‌نا بره باکورێ کوردستانێ ل ده‌ڤه‌را قه‌زا ئه‌لکێ ل گوندێن پیرهه‌سنا و باته، ئاکنجی بووین. د وێ ره‌وشێ دا کوردایه‌تی باره‌کێ گران بوو و باجه‌کا ئێکجار مه‌زن د ڤیا! تێکۆشه‌رێن کوردستانێ شه‌ڤ و رۆژ د کرنه ئێک دا جاره‌کا دی ئومێده‌کا نوی د ناڤا چین و ته‌خێن وه‌لاتی دا دروست ببیت. ژ بۆ ئازادیێ ئاها د وان سالێن تێکۆشینێ و گه‌رمه گه‌رما شۆره‌شێ دا، ل سپێده‌هیان ئه‌م ل قێریا ده‌نگێ هونه‌رمه‌ندێ گه‌لێ مه شڤان په‌روه‌ر و گولستان و محه‌مه‌د شێخۆ و هتد.. ژ خه‌وێ را د بووین، واته قیبله‌گه‌ها مه ته‌نێ کوردستان بوو.
به‌لێ، د ناڤا مالباته‌کا وه‌سا دا چاڤێن من رۆژانه ب وێنه‌کی دکه‌فتن ب دیوارێ مالێ ڤه یێ رازای و بلندکری و جوان خه‌ملاندی بوو، لێ مخابن گه‌له‌ک ڤه‌نه‌کێشا ل رۆژا (1-3-1979)ێ ده‌ما ژ خه‌و رابوویم چاڤێن من ب دایکا من یا گۆربوهه‌شتی که‌فتن و ئه‌ندامێن مه‌زن یێن مالێ و کوردێن دی یێن وه‌کو مه ژ بۆ شۆره‌شێ و به‌رخوه‌دانێ ل هه‌مان گوند و گه‌له‌ک گوندیێن هه‌ڤسووی ل هه‌مبه‌ر وێنه‌ی چه‌ندین وێنه‌یێن دی ژی د ده‌ستێن وان دانه و ب ده‌نگه‌کێ بلند دکه‌نه گری، هه‌لبه‌ت ته‌نێ ژن ل مالێ بوون ژبه‌ركو زه‌لام ل ناڤا جه‌رگێ باشوورێ کوردستانێ د سه‌نگه‌رێن به‌رخوه‌دان و تێکۆشینێ دا بوون، ئاها د وان کێلیکا دا ب ترس من پرسیار ژ دایکا خوه یا گۆربوهه‌شتی کر، گه‌لۆ بوو ل هه‌مبه‌ر وێنه‌ی دگرین؟ گۆتی: کورێ من ئه‌ڤه بارزانیێ مه‌زنه، سه‌رۆکێ کوردستانێ و بابێ هه‌موو کوردانه. نوکه مه‌لایێ گوندی ئه‌م ئاگه‌دار کرین کو وه‌غه‌را داویێ یا کری. د رۆژه‌کا وه‌سا دا من ته‌ماشه‌ی گوندی دکر کو هه‌مو گوندی د ناڤا شینیه‌کا گه‌له‌ک مه‌زن دا نه. ده‌ڤه‌را ئه‌م لێ چه‌ندین گوند ژ دویرڤه مرۆڤی رۆناهیا چرا د دیت، لێ د ڤان شه‌ڤ و رۆژان دا چرا ڤه‌مراندی بوون، د وێ زڤستان و د ناڤ به‌فرا سپی دا ده‌ڤه‌ر هه‌موو ب شینی و ره‌شی هاتبوو داپووشین.
ژنوو د گه‌ل مه‌زناهیا ژیێ من، بارزانیێ مه‌زن و رێبه‌ری و سه‌رۆکاتیا وی یا ئه‌فسانه‌‌یی و کوردستان و وه‌لاتێ مه یێ ئازاد خوه‌یا بوون، کو وه‌کو نان و ئاڤێ بۆ مرۆڤ و تاکێ کورد و کوردستانی گرنگن.
هه‌لبه‌ت د ڤی واری دا مه‌لای دگه‌ل موختار و ماقوول و گوندیان سێ رۆژ شینی راگه‌هاندن ب شه‌ڤ ژی چرا نه دهاتنه هه‌لکرن، ل داویێ ژی سه‌رێ چه‌ندین که‌والان هاته برین و ب خێرا بارزانیێ مه‌زن ل سه‌ر گوندیان هاته به‌لاڤکرن.
له‌وا د خوازم ل ڤێرێ و ل بیره‌وه‌ریا(42) سالیا وه‌غه‌را جه‌نه‌رال بارزانیێ مه‌زن بێژم: بارزانیێ نه‌مر ملکێ هه‌موو کوردانه و پرانیا کوردان وه‌کو من کوردستان د وێنێ وی دا یا ناسکری.
