سەرۆکێ هەرێما کوردستانێ ئیدانەیا هێڕشا مووشەکییا سەر هێزێن هەڤپەیمانییا نێڤدەولەتی دکەت و رادگەهینیت، زۆر ب توندی ئەو هێرشا مووشەکییا ئەڤرۆ چارشەمبی ل سەر هێزێن هەڤپەیمانییا نێڤدەولەتی ب سەرکردایەتییا ئەمریکا ئیدانە دکەت کو ل بنگەهێ عەین ئەسەد ل پارێزگەها ئەنبار هاتییەکرن و بوویە ئەگەرێ گیان ژدەستدانا بەلێندەرەکی.
گۆتییە ژی، ئەو سەرەخۆشیێ ل کەس و کارێن قوربانییان دکەت و ل ڤێ دەما سەخت دا ئەو هەڤسۆزێ خەما وانن.
نێچیرڤان بارزانی سەرۆکێ هەرێما کوردستانێ دووپاتکریە، دووبارەبوونا بەردەوام یا هێرش و پەلاماردانان ل سەر هێزێن هەڤپەیمانییا نێڤدەولەتییا دژی داعشێ کو ل سەر داخازا حکومەتا فیدرال بۆ پشتەڤانی و هەڤکاریێ د بەهنگاربوونا تیرۆرێ ل ئێراقێ نە، ب تەمامی دژی بەرژەوەندیێن ئێراقێیە و ئارامی و سەقامگیرییا وەلات و نها و داهاتی دئێخیتە ناڤ مەترسییەکا راستەقینە.
سەرۆکێ هەرێمێ گۆتییە ژی، بێگومان رەوشا ئیراقێ پێدڤی ب هاریکارییا بەردەوام یا ئەمریکا و هەڤپەیمانییا نێڤدەولەتییە بۆ رێگری کرن ژ بهێزبوونا داعشێ و ژناڤبرنا ئێکجارییا وێ رێکخراوا تیرۆرستی کو رۆژ ب رۆژێ گەف و مەترسیێن وێ زێدەتر دبیت.