زانینگه‌ها قوبەهان کو ئیک ژ جهێن شوونوار یێن دەڤەردارییا ئامێدیێ یە ژینگەها وێ هاتییە تێکدان وپربوویە ژ گلێشى و بەرمایکان.
هەیوار ئامێدی نوونەرێ رێڤەبەرییا شوونوارێن دهۆکێ بۆ خانی نیوز راگەهاند: ژلایێ هندەک کەس و گەشتیاران ڤە کو قەستا زانینگه‌ها قوبەهان کرینە ژینگەها وێ تێکدایە گلێش و بەرمایکێن خوە هێلاینە ل وێرێ، وان ژی ژلایێ خوەڤە داخواز ژ باژێرڤانییا ئامێدیێ کریە و ئه‌و ئاگەهدارکرینە ژبۆ پاقژکرنا ئه‌ڤی جهێ شوونواری.
ئەندازیار ئەڤراز حەسەن سەرۆکێ باژێرڤانییا ئامێدیێ بۆ خانی نیوز راگەهاند: ئەو ژلایێ نوونەرێ شونواران ڤه هاتینە ئاگەهدارکرن ژ بۆ پاقژکرنا زانینگه‌ها قوبەهان وکێم تر ژ 12 دەمژمێرێن دی، ئەو جهێ شوونواری دێ ژ هەموو گلێش و بەرمایکان ژلایێ تیمێن وان ڤە هێتە پاقژکرن.
زانینگه‌ها قوبەهان دکەڤیتە باکوورێ رۆژئاڤایا باژێرێ ئامێدیێ ل سەردەمێ (سولتان حسێن وەلی) د ناڤبەرا سالا 1533ز تا 1573ز هاتییە ئاڤاکرن و پێک دهێت ژ 16 قوبەیان و 60 ژۆرێن خواندنێ بۆ فەقەیان و نێزیکی 300 تا 400 قوتابیان لێ دخواند، نوکە ژی جهەکێ شوونوارییە و پترییا ئاڤاهیێ وێ خراب بوویە و هەرفتییە و هەتا نوکە نەهاتییە نووژەنکرن.
خانى نیوز، هه‌یوار ستار
