ل دەسپێکا هاتنا وەرزێ بهارێ هەتا دوماهییا وێ ژئەگەرێ بارینەکا زور یا بارانان و پەیدا بوونا شەهەکا باش دناڤ ئاخێ دا رێژەکا بەرچاڤ و باش یا گیایێ بهارێ ل دەڤەرێن چیایی یێن نێروە و رێکان و دۆسکی ژوریان سەر ب ناحیا شێلادزێ ڤە ژلایێ خەلکێ دەڤەرێ ڤە دهێتە پەیداکرن و سالانا مفایەکێ باش بۆ خوارنا خوە و فرۆتنێ ژێ دیتییە.
وەلاتی رەجەب نەعمان بو خانی نیوز گۆت: سالێن بوری ژین و ژیارا وان ل سەر بەرهەمێ بهارێ بوو چونکى دەڤەرەکا چیایی یە و وان مفایەکێ باش ژ ڤان دەڤەران دیتییە، بەلێ مخابن ئەڤ سالە وەکو سالێن بوری گیایێ بهارێ ل بازارێ شێلادزێ ناهێـته دیتن، ئهو ژى ژبەر هەبوونا پەکەکێ ل دەڤەرێ و بۆردومانکرنا فرۆکێن تورکیا ل سەر دەڤەرێ.
جەلال جەمیل ئێك ژ فرۆشیارێن بازارێ شێلادزێ یه گۆت: بو ماوێ 20 سالانە فرۆشیارە و کارێ کرین و فروتنا گیایێ بهارێ دكهت، بەلێ ئەڤ سالە وەکو سالێن دەرباز بووی گیایێن بهارێ دناڤ بازارى دا نینه، ژبەرکو خەلکێ دەڤەرێ نەشێن سەرەدانا گوند و وارێن خوە بکەن ب مهرەما پانجارێ گیایێ بهارێ.
دلۆڤان رەزیکی رۆژنامەڤان دبێژیت: شەر و ئالۆزیێن ل سەر دەڤەرێ ژلایێ پەکەکێ و تورکیاڤە کارتێکرنەکا مەزن ل سەر ژیانا خەلکێ دەڤەرێ کریە، ل سنورێ قەزا ئامێدیێ ب تایبەتی ناحیا شێلادزێ ژبەرکو دەڤەرەکا چیایی یە خەلکێ دەڤەرێ ژیانا وان ل سەر داهاتێ گوند و چیایێن وانە ب تایبەتی ل وەرزێ پانجارێ گیایێن بهارێ، لێ ئەڤرۆ خەلکێ دەڤەرێ نەشێن سەرەدانا گوند و وارێن خوە بکەن، بەلێ ئەگەر ئارامی ل ڤێ دەڤەرا هەبایە خەلکێ دەڤەرێ دا مفایەکێ باش ل وەرزێ بهارێ ژ داهاتی ڤان دەڤەران بینن، وەکو کڤارك و لیش و جۆرین هتد.
شەرێ پەکەکێ و تورکیا بۆ سەر دەڤەرا ئامێدیێ کو بوویە ئەگەر پتر ژ 200 گوند بهێنە چۆلکرن و خەلك نەشێن مفای ژ داهاتێ گوند و وارێن خوە ببینن و بوویە ئەگەرێ شەهید بوونا پتر ژ ۳۰ وەلاتیان.
