مامۆستایێ زانکۆیی وڤەکۆلەرێ ئاسایشا نەتەوەیی
ئاسایش رامانا نەمانا ترسێ و ژیانکرن ب ئارامی و ئازادانە بێ گەف و مەترسی دده‌ت، ئاسایش دھێتە پارڤەکرن بۆ ئاسایشا کەسی، نەتەوەیی، ھەرێمی و کۆمی، دگەل ئەڤێ پارڤەکرنێ فۆرمێ دەولەتا نەتەوەیی ژی دھێت گۆتن ل دەمێ ئەڤ دەولەت دروستبووین پشتی پەیمانا Westphalia ل 1648 و شۆرەشێن فەرەنسی و جەنگێن جیھانی ئێکێ و دوویێ، ل پشت ئەڤێ دەولەتا نەتەوەیی سەرکردەکێ نەتەوەیی و کارێزمایی دیاردکه‌ت، ئاسایشێ گرنگیەکا بێ وێنە ھەیە بۆ کەسی، نەتەوە و دەولەتێ، د ھەمان دەمدا باندۆرەک راستەراست ھەیە ل سەر دابینکرن و گەشەکرنا بەرژەوەندیێن وان ب ھەموو جۆران، ژبەر ئەڤێ گرنگیێ ھەموو تاک، گەل، وەلات و کۆمەلگەھێن نێڤدەولەتی دابینکرنا ئاسایشێ ب ئەرکەکی زیندیێ خوە دزانن و ھەموو شیانان بکاردئینن بۆ دابینکرنا وێ، بێ گۆمان جۆرێ بەرژەوەندى و رێکێن دابینکرن و پەرەپێدانێ ژ کەسی، نەتەوە و دەولەت و کۆمەلگەھا ناڤدەولەتێ جۆدانە، ل سەر ئەڤێ دیتنێ دوو قوتابخانە ھەنە، قوتابخانا ستراتیژی ب رابەراتییا Lippman داکۆکیێ ل ئاسایشا لەشکەری و نەھێلانا گەفێن دەرڤە ژ دەولەتەکێ، قوتابخانا دی قوتابخانا ھەڤچەرخ ب سەرکێشییا Micnmar و Barry buzan داکۆکیێ ل رەھەندێ کۆمەلگەھی دکه‌ن ب پەرەپێدانێ د بیاڤێن ئابووری و کۆمەلایەتی، ئارمانجا ئەڤان ھەردوو قوتابخانان دەستەبەرکرنا ئاسایشێ ب جۆرێن سیاسی، ئابووری، کۆمەلایەتی و لەشکەری بۆ نەتەوە و دەولەتێ ب رەنگەکی دی دابینکرنا ئاسایشا سنورێ نەتەوە و دەولەتێ، ئاسایشا ناسنامە و ناڤ و نیشان و قەبارەیێ دانپێدانکری یێ دەولەتێ، ئاشتییا کۆمەلایەتی و پەیوەندی و دیپلۆماسیەت، ئاسایشا ژێدەر و شیانێن نەتەوە و دەولەتێ، ئاسایشا دەستوری ویاسا و مافێن مرۆڤ، ئاسایشا ھەوالگیری وپێزانین وبەرژەوەندیێن نەتەوەیی.
د مێژوویا نوو یا جیھانیدا ب جەنگێن وێ ئێک و دوو، نەتەوەیی کورد وەک ھەر نەتەوەیەک دن ل رۆژھەلاتا ناڤەراست نەبوو خوەدی دەولەتا خوە یا نەتەویی، داوی جار ھات پارڤەکرن د ناڤبەرا نەتەوەیێن تۆرک، فارس و عەرەب دا، ب ڤی رەنگی ئاسایشا خوە ژ دەست دان، ھەلبەت مەرجێن نەتەوە دھێن دیتن د ناڤا کورداندا ب جۆرەکێ ئێکەتییا نفش، زمان، مێژوو، جوگرافیا، ھەست، ھەلوێست و بەرژەوەند، ل ئالیەکی دن ئەڤان نەتەوەیێن دۆژمن بەردەوام کارکرییە پێخەمه‌ت ئەڤان ئێکەتییان لاواز بکه‌ن داکو قرکرنا نەتەوا کوردان جێ ببت، ژبۆ ئەڤێ ب بەرناما داریژی گەلەگ رێکار گرتینە بەر ژ ئەوان ژى پار یان جوداکرن، سیخوری و کوشتنا بکۆم.
ل دەمەکێ خواندنەک دھێتکرن بۆ رۆپەلێن پێڤاژوویا بزاڤا رزگاریخوازا کوردان د ئیراقێ دا، ھەمان دەم ژیێ دەولەتا ئیراقێ ب جۆرێ رژێمێن دەستھەلات کرین ھەتاکو نوکە ب تنێ ئێک سەرکردەیێ نەتەوەیی و کارێزمایی دھێت دیتن ب ناڤێ (مستەفا بارزانی)،کارێزمایەک رێژەدار، ب رەنگەکێ سالۆخەتێن بێ ھەڤتا و ئێکانە ل دەف ھەبوونە، خوەدی فەرمان و بریار، ئیرادە، دلۆڤانی، نەخشەکێش، بانگەوازی و گوھداریکرن ل خەلکێ خوە و بیانییان ب دلسۆزانە، ئاشتی و لێبورین و شیانێن نەئاسایی و دانپێدان ب شکەستنان و گھۆرێن بۆ سەرکەفتنێن مەزن و ھیڤی و خەباتا نەتەوەیی، بێ گۆمان بۆ ئەقلێ عەرەبی ب سوننە وشیعە ب دوژمن و دۆستان د ئیراقێ دا، ئەقلێن دوژمن و دۆستێن دی یێن کوردان ل تەڤایا جیھانێ، (مستەفا بارزانی) سەرکرده‌یێ ئێکێ د ئیراقێ دا بۆ دابینکرن و پەرەپێدانا ئاسایشا کوردان دھێت ھەژمارتن، نوونەرێ زمان، ئاخ، چاند و کەلتۆر و مێژوو و بەرژەوندیێن کوردان بوویە، د ھەمان دەم دا پاشەرۆژا وان، بارزانی وەک سەرکردەیەک نەتەوەیی ئاسایش بۆ کوردان داخازکرییە ژ بەغدا دیسان کوردستانیێن دی ئەوێن دگەل وان ژیانێ دکن، ئاسایشەک مافێن مرۆڤان دگەل بھێت دیتن ب جۆرێ ئازادییا رادەربرینێ، کەرامەت و ئاسایشا ئاینی، ئاشتی و پێکڤەژیان و زانست، ب رەنگەکی دی ئاسایشا نەتەوەیی بۆ کوردان ب رەنگێ سیاسی، ئابووری، کۆمەلایەتی ولەشکەری.
گرنگە بھێت زانین بارزانی بەری پەنایێ بۆ شۆرەشا چەکداری ببه‌ت ب شۆرەشا ئیلولێ سالا 1961 و دەسپێکێن ئاسایشا کوردان دابین بکه‌ت، پرەنسیپێن ئاشتیێ گرتینە بەر ئەوێن نەتەوەیێن ئێگرتی د خالێن ئێک و دوو دا ژ ئارتیکەلا (33) ئاماژە پێکرین، پێدڤییه لایەنێ ناکۆک ھەول بده‌ت ب رێکێن ئاشتیانە و ناڤبژیڤانی بگریته بەر یان پەنایێ ببه‌ن بۆ ئاژانس و رێکخستنێن ھەرێمی، دانوستانێن وی دگەل دەولەتا ئیراقێ ب حکومەتا نوری سەعید، عەبدولکەریم قاسم و بەعسییان و عەبدولسەلام و عەبدولرەحمان یان نامەیێن وی بۆ سەرۆک وەلاتێ ئێکگرتیێن ئەمریکا، سەرۆکێ مسرێ.
بارزانی ھەمی گاڤا داکۆکی کرییە ئەم گەف و مەترسی بۆ سەر ئاسایشا چ کەسەکێ، نەتەوەک و دەولەته‌کێ نینن بەلکو ئەم ب ئەرک دزانن دابینکرنا ئاسایشا نەتەوا خوە بکن ئەوا ژمە ھاتییە ستاندن، دبینن رۆژانە نەتەوەیێ مە یێ دھێته قرکرن، کەسێ مستەفا بارزانی وەھا کر کو د ئیراقێ دا شەنگەستێ ئاسایشا کوردان بھێت دابینکرن و کورد دانانه سەر رێکەک راست و دروست بۆ ھندێ بەردەوامیێ ب کاروانێ ئەڤێ ئاسایشی بدن، کەسایه‌تییا بارزانی بوو سەدەم رێگری بھێت كرتن ئیدى دەست درێژی و زۆرداری ل سەر مافێن کوردان نەھێتکرن .
گرنگە ئەڤرۆ باشوورێ کوردستانێ ب حکۆمەت و پارتێن سیاسی وەک پێدڤی مفا ژ دەستور و فەرھەنگ و رێبازا (مستەفا بارزانی) وەربگرن کا چاوا ب ئەوان شیانێن سنوردارکری ب جورێن: لەشکەری، سیاسی، ئابووری و کۆمەلاتی دابینکرنا ئاسایشا کورد و کوردستانیان کر، ب دیتنا مە ل دەمەکێ ھەلسەنگاندنەکێ دکه‌ن بۆ ئەڤرۆیا رەھەندێن ئاسایشا کوردان، دبینن باشوورێ کوردستانێ ب کورد و کوردستانی سەرکەفتی نینن د پێناسەکرنا ئاسایشا نەتەوەیی، ئارمانج، گەف و مەترسی، بەرژەوەندا نەتەوەی، ئاوا و میکانزمێن دابینکرنا و پەرەپێدانی! لەورا بۆ پێناسەکرن و ناسکرنا ئەڤێ چەندێ داکۆکیێ دکن فەرھەنگا شۆرەشا باشووریان ب ھەموو سەرکەفتن و شکەستن و سەرکردەیێ وێ یێ نەتەوەیی مستەفا بارزانی بھێن خواندن، دیسان ھێزا نەتەوەییا باشوور وەک پێدڤی بۆ نەتەوە بھێت بکارھینان، زانابوون و ئاشنابوون بھێتکرن ب ھونەرێ سیاسەت، دیپلۆماسیەت و ھەفپەیمانی، ئاسایشا کۆمەلایەتی، ئابووری و لەشکەری و ھەوالگیری، کارگیریا باش و دەستھەلاتا دیموکراسی و سەرکردە و سەرکردایەتی.
